موبائل ایپ سے قرضوں پر شرحِ منافع میں 67 فیصد کمی

کراچی: سیکیورٹیز اینڈ ایکسچینج کمیشن آف پاکستان (ایس ای سی پی) نے موبائل ایپ سے قرضوں پر شرحِ منافع میں 67 فیصد کمی کر دی ہے۔
ایس ای سی پی نے اس حوالے سے نیا سرکلر جاری کر دیا، جس کے مطابق موبائل ایپ سے قرض پر سالانہ شرحِ منافع 90 فیصد مقرر کر دی گئی ہے، اور موبائل ایپس پر شرحِ منافع کی حد 274 فیصد سے کم کی گئی ہے۔
سرکلر کے مطابق 10 ہزار روپے کے قرض پر یومیہ لاگت 24 روپے 66 پیسے ہوگی، جبکہ تمام فیسیں اور چارجز بھی قرض کی مقررہ لاگت میں شامل ہوں گے۔
شرحِ منافع میں کمی کا مقصد قرض لینے والوں کو زیادہ لاگت اور قرضوں کے بوجھ سے بچانا ہے۔
ڈیجیٹل ایپ سے 50 ہزار روپے تک کا قرض زیادہ سے زیادہ 90 دن کے لیے دیا جا سکے گا۔ قرض کی جلد ادائیگی پر صرف ان دنوں کی لاگت وصول ہوگی جن میں قرض صارف کے پاس رہا۔ مقررہ تاریخ کے بعد پہلے تین دن تاخیر کا جرمانہ وصول نہیں کیا جا سکے گا۔
موبائل ایپ سے قرض لینے والوں کی ڈیجیٹل ریپازٹری قائم کی جا رہی ہے، جس سے قرض دہندگان صارف کے پہلے سے موجود قرضوں کی جانچ کر سکیں گے۔ اس ریپازٹری کی مدد سے قرض کی ادائیگی میں مشکل کا شکار صارف کو مزید قرض دینے سے احتیاط کی جا سکے گی۔
ایس ای سی پی نے موبائل ایپ لون کمپنیوں کو 15 روز میں اپنی ایپس اور دستاویزات اپ ڈیٹ کرنے کی ہدایت کر دی ہے۔











