پی ٹی آئی رہنما تیمور جھگڑا، کامران بنگش اور عرفان سلیم جیل منتقل

راولپنڈی: پی ٹی آئی رہنماؤں تیمور جھگڑا، کامران بنگش اور عرفان سلیم کو گزشتہ روز گرفتار کرنے کے بعد جیل منتقل کر دیا گیا۔
تینوں رہنماؤں کو گزشتہ رات پشاور ہائیکورٹ کے مرکزی گیٹ سے حراست میں لیا گیا تھا۔
گرفتاری سے قبل ایس ایس پی آپریشنز فرحان خان بار روم میں آئے اور پی ٹی آئی رہنماؤں کو گرفتاری دینے پر آمادہ کرنے کی کوشش کی۔ اس کے بعد وہ نفری کے ہمراہ ہائیکورٹ کے مین گیٹ پر موجود تھے، جہاں تینوں رہنماؤں کو حراست میں لیا گیا۔
گرفتاری کے وقت ایک صحافی نے ایس ایس پی آپریشنز سے سوال کیا کہ کیا آپ کے پاس تھری ایم پی او کے آرڈر موجود ہیں جس کے تحت پی ٹی آئی رہنماؤں کو گرفتار کیا گیا۔ ایس ایس پی آپریشنز فرحان خان نے کہا کہ میرے پاس تھری ایم پی او آرڈر موجود ہے۔ پولیس کے مطابق تینوں رہنماؤں کو تھری ایم پی او کے تحت حراست میں لیا گیا ہے۔
انسداد دہشتگردی عدالت نے تینوں رہنماؤں کی ریڈیو حملہ کیس میں درخواست ضمانت خارج کر دی تھی، جس پر پولیس نے انہیں گرفتار کرنے کی کوشش کی۔ تاہم انصاف لائرز فورم کے وکلا نے پولیس کو ملزمان کی گرفتاری سے روک دیا تھا، اس دوران تیمور سلیم جھگڑا، کامران بنگش اور عرفان سلیم ہائی کورٹ بار روم میں موجود رہے۔
پی ٹی آئی رہنما عبوری ضمانت کے لیے پشاور ہائیکورٹ پہنچے، عدالت نے ان کی درخواست ضمانت منظور کر لی۔ تاہم ایس ایس پی آپریشنز فرحان خان پولیس کی بھاری نفری کے ہمراہ پشاور ہائیکورٹ کے مین گیٹ کے باہر موجود رہے۔
بعد ازاں وہ پی ٹی آئی رہنماؤں کو گرفتاری دینے پر آمادہ کرنے کے لیے بار روم آئے اور ان سے ملاقات کی، جس کے بعد تحریک انصاف کے رہنماؤں کو حراست میں لے کر اپنے ساتھ گاڑی میں لے گئے۔











