سہ ماہی ایڈجسٹمنٹ: بجلی فی یونٹ ایک روپے 34 پیسے مہنگی ہونے کا امکان

اسلام آباد: ملک بھر کے لیے سہ ماہی ایڈجسٹمنٹ میں بجلی ایک روپے 34 پیسے مہنگی ہونے کا امکان ہے۔
نیشنل الیکٹرک پاور ریگولیٹری اتھارٹی (نیپرا) نے سماعت مکمل کرنے کے بعد فیصلہ محفوظ کر لیا، جو بعد میں جاری کیا جائے گا۔ آئندہ 3 ماہ کے لیے فی یونٹ بجلی کتنی مہنگی ہوگی، یہ نیپرا تعین کرے گا۔
سماعت چیئرمین نیپرا وسیم مختار چوہدری کی زیر صدارت اسلام آباد میں ہوئی۔ بجلی مہنگی کرنے کے لیے ڈسکوز نے نیپرا میں درخواست جمع کرائی تھی، جس میں بجلی صارفین سے 23 ارب 33 کروڑ روپے کی وصولی مانگی گئی ہے۔
یہ اضافہ کراچی سمیت ملک بھر کے لیے فی یونٹ ایک روپے 34 پیسے بنتا ہے، اور اس کا اطلاق دسمبر 2026 سے فروری 2027 کے لیے ہوگا۔ درخواست سال 2026 کی تیسری سہ ماہی ایڈجسٹمنٹ میں جمع کرائی گئی تھی۔
کیپیسٹی چارجز کی مد میں 38 ارب 92 کروڑ روپے وصولی کی درخواست کی گئی۔ آپریشنز اینڈ میٹیننس کی مد میں 5 ارب 59 کروڑ 70 لاکھ روپے اضافہ مانگا گیا۔ جولائی تا ستمبر 2026 کی سہ ماہی ایڈجسٹمنٹ کا اطلاق کے الیکٹرک پر بھی ہوگا۔











