شاہ رخ خان: گھر منت گوری کا ہے، مجھے گھر میں کچھ کرنے کی اجازت نہیں

ممبئی: بالی ووڈ سپر اسٹار شاہ رخ خان نے اپنے گھر سے متعلق حیرت انگیز انکشاف کیا ہے کہ منت گوری کا ہے اور انہیں گھر میں کچھ کرنے کی اجازت نہیں۔
بھارتی میڈیا کے مطابق شاہ رخ خان نے حال ہی میں دبئی کی ایک تقریب میں شرکت کی، جہاں میزبان اور فلم ساز کرن جوہر نے ان سے سوال کیا کہ انہیں اپنے گھر میں کون سے کام کرنے کی اجازت نہیں ہے۔
اس پر اداکار نے مذاق کرتے ہوئے کہا کہ میرے گھر میں مجھے کچھ کرنے کی اجازت نہیں ہے۔ انہوں نے واضح کیا کہ منت ان کی اہلیہ گوری خان کا ہے اور وہ وائی فائی، کھانے پینے، رنگوں، پینٹنگز، سیڑھیوں، لائٹس اور فرنیچر جیسی چیزوں کے بارے میں کوئی بات نہیں کر سکتے، گوری نے بہت اچھا گھر بنایا ہے۔
شاہ رخ نے گھر کی اہمیت بتاتے ہوئے کہا کہ کم عمری میں ہی ان کے والدین کا انتقال ہو گیا تھا اور گوری خان سے شادی سے پہلے ان کا اپنا کوئی گھر نہیں تھا، اپنا گھر ہونا ان کے سب سے بڑے خوابوں میں سے ایک تھا۔
انہوں نے کہا کہ وہ اپنی فلموں، خاندان اور کام سے محبت کرتے ہیں، لیکن ایک ایسی جگہ کا ہونا جسے وہ اپنا کہہ سکیں، ان کے دل میں ایک خاص مقام رکھتا ہے۔











