ہری پور میں فوجی حوالدار کے قتل کا اشتہاری ملزم کیماڑی سے گرفتار

کراچی: اے وی سی سی / سی آئی اے پولیس نے خیبر پختونخوا کے ضلع ہری پور میں پاک فوج کے حوالدار کے قتل کے مقدمے میں مطلوب اشتہاری ملزم کو کراچی کے ضلع کیماڑی سے گرفتار کرلیا۔
اینٹی وائلنٹ کرائم سیل کے ترجمان کے مطابق ایس ایس پی اے وی سی سی آصف رضا بلوچ کی ہدایت پر اشتہاری اور مفرور ملزمان کے خلاف کریک ڈاؤن جاری ہے۔ اسی دوران خفیہ اطلاع پر کیماڑی میں کارروائی کرتے ہوئے ملزم ساجد حنیف ولد محمد حنیف کو پکڑا گیا۔
پولیس کے مطابق ملزم ہری پور کے تھانہ بیڑ میں درج مقدمہ نمبر 229/23 زیر دفعہ 302/34 پی پی سی میں مطلوب تھا۔ اس پر الزام ہے کہ وہ پاک فوج کے حوالدار اظہر خان کو قتل کرکے ہری پور سے فرار ہوا اور کیماڑی آکر روپوش ہوگیا۔
پولیس حکام کا کہنا ہے کہ گرفتار ملزم عادی جرائم پیشہ ہے اور اس سے پہلے اغوا برائے تاوان کے ایک مقدمے میں جیل بھی جاچکا ہے۔
ملزم کو مزید تفتیش اور قانونی کارروائی کے لیے ہری پور پولیس کے حوالے کردیا گیا ہے۔











