ایران کا بحرین میں امریکی اڈے اور ریڈار پر ڈرون حملے کا دعویٰ

منامہ: ایران کی پاسدارانِ انقلاب نے خلیجی ملک بحرین میں واقع امریکی فوجی اڈے اور فضائی دفاعی ریڈار تنصیبات پر کامیاب ڈرون حملے کا باضابطہ دعویٰ کیا ہے۔
حملے کی اطلاعات کے بعد بحرین کی وزارتِ داخلہ نے اتوار کی صبح شہریوں کو ممکنہ خطرات سے آگاہ رکھنے کے لیے دو ہنگامی انتباہ جاری کیے اور رہائشیوں کو پرسکون رہتے ہوئے قریب ترین محفوظ مقامات پر منتقل ہونے کی ہدایت کی۔
دارالحکومت منامہ کے آس پاس رہنے والے عینی شاہدین کے مطابق صبح کے اوقات میں متعدد زوردار دھماکوں کی آوازیں سنی گئیں، جس سے علاقے میں خوف و ہراس پھیل گیا۔
عسکری حکام کا کہنا ہے کہ فضائی دفاعی نظام کو فوری طور پر متحرک کر دیا گیا، تاہم فوری طور پر واضح نہیں ہو سکا کہ امریکی فوجی اڈے یا ریڈار تنصیب کو کتنا نقصان پہنچا۔
دفاعی تجزیہ کاروں کے مطابق خلیج میں جاری ایران امریکہ محاذ آرائی کے دوران بحرین میں امریکی تنصیبات کو نشانہ بنانے کا یہ دعویٰ خطے کی سلامتی کے لیے ایک انتہائی سنگین موڑ ثابت ہو سکتا ہے۔











