مسلم 500 فہرست: شہباز شریف اور فیلڈ مارشل عاصم منیر مشترکہ طور پر سرفہرست

اسلام آباد: دنیا کے 500 بااثر ترین مسلمانوں کی سالانہ فہرست کے 2027 کے ایڈیشن میں وزیراعظم شہباز شریف اور چیف آف ڈیفنس فورسز و چیف آف آرمی اسٹاف فیلڈ مارشل عاصم منیر مشترکہ طور پر پہلے نمبر پر آئے ہیں۔ جیو نیوز کے مطابق ان کے ساتھ سعودی فرمانروا شاہ سلمان، ولی عہد محمد بن سلمان اور ترک صدر رجب طیب اردوان بھی اسی مقام پر شامل ہیں۔
'دی مسلم 500: دنیا کے 500 بااثر ترین مسلمان' کے عنوان سے شائع ہونے والی یہ فہرست عمان میں قائم رائل اسلامک اسٹریٹجک اسٹڈیز سینٹر نے مرتب کی ہے۔
ادارے کے مطابق یہ پہلا موقع ہے کہ ایک سے زائد شخصیات مشترکہ طور پر سرفہرست آئی ہیں۔ اس نے اس مشترکہ درجہ بندی کی وجہ پاکستان، سعودی عرب اور ترکیہ کے درمیان مکہ مشترکہ دفاعی معاہدے کو قرار دیا۔
اشاعت میں کہا گیا کہ پہلے نمبر پر پانچ شخصیات ہیں، تاہم یہ دراصل تین مشترکہ اندراجات میں تقسیم ہے، جو مسلم ممالک کے ایک دوسرے کے تحفظ کے لیے مل کر کام کرنے کے طریقے میں بڑی تبدیلی کی نمائندگی کرتا ہے۔ اشاعت کے مطابق اس تاریخی فیصلے کی بنیادی وجہ مکہ مشترکہ دفاعی معاہدہ ہے۔











