یمنی حکومتی فورسز کا باب المندب اور ذباب ایئرپورٹ سے انخلا، عدن کے دفاع پر توجہ

عدن: یمن کی حکومتی فورسز نے اعلان کیا ہے کہ وہ باب المندب آبنائے کے قریب کے علاقوں سے نکل رہی ہیں تاکہ اپنے مرکزی اڈے عدن کے دفاع پر توجہ دے سکیں۔ بی بی سی اردو کے مطابق اس پسپائی کو ایران نواز حوثیوں کے خلاف جنگ میں سعودی عرب کی قیادت میں قائم اتحاد کے لیے بڑا دھچکا قرار دیا جا رہا ہے۔
حکومتی فورسز نے اپنے بیان میں کہا کہ جنوبی مسلح افواج تعز صوبے کے مغربی حصے میں واقع ذباب ایئرپورٹ اور باب المندب کے علاقے سے افواج کی منتقلی کا اعلان کرتی ہیں۔
اس اعلان کے ساتھ بحیرہ احمر کے داخلی راستے کے قریب ساحلی علاقوں کا کنٹرول دوبارہ حاصل کرنے کے لیے جاری چھ ہفتوں کی جوابی کارروائی باضابطہ طور پر ختم ہو گئی ہے۔ حوثیوں نے تیز پیش قدمی کر کے ان علاقوں پر قبضہ کر لیا تھا، جس سے سعودی عرب کی تیل برآمدات پر دباؤ بڑھا تھا۔
بی بی سی کے مطابق اس پسپائی کے بعد امکان ہے کہ حوثی دوبارہ عدن کی طرف پیش قدمی کریں، جبکہ سعودی عرب کے لیے حوثیوں کے ڈرون اور میزائل حملے روکنا مزید مشکل ہو سکتا ہے۔
یمنی حکومتی فورسز 2015 میں حوثیوں کے دارالحکومت صنعا پر قبضے کے بعد سے جنوبی ساحلی شہر عدن میں قائم ہیں۔ سعودی عرب اور حوثیوں کی جانب سے اس پیش رفت پر تاحال کوئی ردِعمل نہیں آیا۔











