خضدار: ایس ایس پی محمد بلوچ کا شہر کے مختلف چوکوں پر ٹریفک نظام کا تفصیلی معائنہ

خضدار: شہر کی رونقیں بحال کرنے اور ٹریفک نظام کو بہتر بنانے کے لیے ایس ایس پی خضدار محمد بلوچ میدان میں آ گئے ہیں۔

ایس ایس پی خضدار محمد بلوچ نے انجمن تاجران خضدار کے صدر حافظ حمیداللہ مینگل اور پولیس نفری کے ہمراہ آج خضدار شہر کے مختلف پوائنٹس کا تفصیلی معائنہ کیا۔
ٹریفک نظام کا جائزہ
انہوں نے مختلف چوکوں اور چوراہوں پر پیدل واک کی اور ٹریفک کے نظام اور ٹریفک پولیس کی کارکردگی کا جائزہ لیا۔
معائنے کے دوران ایس ایس پی خضدار نے ٹریفک اہلکاروں کو ہدایت کی کہ شہر کے مصروف ترین چوکوں پر ٹریفک کی روانی ہر صورت یقینی بنائی جائے۔ غلط پارکنگ اور تجاوزات کے خاتمے کے لیے فوری اقدامات کیے جائیں تاکہ عوام اور تاجروں کو کسی قسم کی پریشانی کا سامنا نہ کرنا پڑے۔
انجمن تاجران خضدار کے صدر حافظ حمیداللہ مینگل نے ایس ایس پی خضدار کے اقدامات کو سراہتے ہوئے کہا کہ پولیس اور تاجر برادری کے تعاون سے شہر میں امن و امان اور ٹریفک کی بہتری کے لیے مشترکہ کوششیں جاری رہیں گی۔
ایس ایس پی خضدار محمد بلوچ نے کہا کہ ٹریفک کو کنٹرول کرنے کے لیے جدید نظام لایا جا رہا ہے، جس سے شہر میں ٹریفک جام کا مسئلہ مستقل بنیادوں پر حل ہوگا اور شہریوں کو سہولت ملے گی۔
انہوں نے کہا کہ خضدار پولیس عوام کی خدمت اور شہر کی خوبصورتی و رونق بحال رکھنے کے لیے پرعزم ہے۔
تصویر: بشکریہ ڈی جی پی آر بلوچستان











