گوادر انڈسٹریل اسٹیٹ میں نئی اسٹیل ملز کے قیام کی تیاریاں تیز

گوادر: 18 نومبر۔ وزیراعلیٰ بلوچستان میر سرفراز بگٹی کے وژن اور صوبائی حکومت کی صنعتی و معاشی ترقی کی پالیسی کے تحت گوادر میں صنعتی سرگرمیوں کے فروغ اور سرمایہ کاری کے نئے مواقع پیدا کرنے کے لیے عملی اقدامات جاری ہیں۔
اس سلسلے میں گوادر انڈسٹریل اسٹیٹ میں نئی اسٹیل ملز کے قیام کی تیاریاں تیز کر دی گئی ہیں، جبکہ منصوبے کی فاؤنڈیشن کے کام کے لیے تکنیکی انجینئرز کی ٹیم بھی پہنچ گئی ہے۔
انڈسٹریل اسٹیٹ کا دورہ
جنرل منیجر گوادر انڈسٹریل اینڈ اسٹیٹ ڈویلپمنٹ اتھارٹی (GIEDA) محمد ہاشم سرور نے انڈسٹریل اسٹیٹ کا دورہ کیا اور نئی اسٹیل ملز کے قیام کے لیے جاری تیاریوں اور تکنیکی امور کا جائزہ لیا۔
اس موقع پر بلوچستان پیکنگ پلاسٹک کمپنی کی صنعتی و پیداواری سرگرمیوں کا بھی معائنہ کیا گیا، جہاں کمپنی اپنی سرگرمیاں باقاعدگی سے جاری رکھے ہوئے ہے۔
روزگار اور معیشت پر اثرات
جنرل منیجر محمد ہاشم سرور نے کہا کہ GIEDA کی ترقیاتی پالیسی کے مطابق گوادر انڈسٹریل اسٹیٹ میں نئی صنعتوں کے قیام، سرمایہ کاروں کو سازگار ماحول کی فراہمی اور صنعتی بنیادی ڈھانچے کی بہتری پر خصوصی توجہ دی جا رہی ہے۔
نئی اسٹیل ملز سمیت صنعتی منصوبوں پر پیش رفت سے مقامی سطح پر روزگار کے مواقع پیدا ہوں گے، صنعتی پیداوار میں اضافہ ہوگا اور گوادر کی معیشت کو مزید تقویت ملے گی۔











