جامعہ تربت: سوشیالوجی کے طلبہ کا تحقیقی مقالوں کا کامیاب دفاع

تربت: جامعہ تربت کے شعبہ سوشیالوجی کے بی ایس (سیشن 2023-26) کے فائنل سمسٹر کے طلبہ نے امتحانی پینل کے سامنے اپنے تحقیقی مقالوں کا کامیابی سے دفاع کیا۔

طلبہ نے پینل کے سامنے عصر حاضر کے مختلف سماجی مسائل پر مبنی اپنے مقالوں کے نتائج پیش کرتے ہوئے تحقیقی طریقہ کار اور تھیوریٹیکل فریم ورک کی وضاحت کی۔

پینل کے ارکان نے ابھرتے ہوئے نوجوان محققین کے تحقیقی کام اور پریزنٹیشنز کے معیار کو سراہا۔

امتحانی پینل کی صدارت فیکلٹی آف سوشل سائنسز کے ڈین ڈاکٹر محمد طاہر حکیم نے کی، جبکہ ڈاکٹر عبدالروف نے ایکسٹرنل ایکسپرٹ کے فرائض انجام دیے۔

ڈاکٹر طاہر حکیم اور ڈاکٹر عبدالروف نے ان مقالوں کو ایک اہم علمی سنگ میل قرار دیتے ہوئے کہا کہ اس نوعیت کی تحقیقی سرگرمیاں پالیسی سازی اور کمیونٹی کی ترقی میں معاون ثابت ہو سکتی ہیں۔

جامعہ تربت کے ترجمان کے مطابق وائس چانسلر پروفیسر ڈاکٹر گل حسن نے نوجوان محققین اور ان کے والدین، سپروائزرز اور فیکلٹی ممبران کو اس کامیابی پر مبارکباد دی۔

ان کا کہنا تھا کہ اس نوعیت کی تحقیقی سرگرمیاں طلبہ کو تحقیقی مسائل سمجھنے اور ان کے قابل عمل حل تجویز کرنے میں مدد دینے کے علاوہ ان میں تجزیاتی و مثبت سوچ بھی پیدا کرتی ہیں، جو اعلیٰ تعلیم اور پیشہ ورانہ زندگی کے لیے ناگزیر ہے۔

انہوں نے جامعہ تربت میں تحقیقی کلچر کو مزید فروغ دینے کے لیے یونیورسٹی کے عزم کا اعادہ بھی کیا۔

تصویر: بشکریہ ڈی جی پی آر بلوچستان