صوبوں کے معاملے پر ریفرنڈم ہوا بھی تو فیصلہ پارلیمنٹ کرے گی: رانا ثنا اللہ

اسلام آباد: وزیراعظم کے مشیر رانا ثنااللہ نے کہا ہے کہ صوبوں کے معاملے پر اگر ریفرنڈم ہو بھی جاتا ہے تو معاملہ طے تو پارلیمنٹ نے کرنا ہے۔

نجی ٹی وی سے گفتگو کرتے ہوئے رانا ثنااللہ نے کہا کہ عمران خان کے دونوں وکلا نے ان سے ملاقات کی ہے، ان کا رویہ آنے والے دنوں میں معلوم ہوگا۔ بانی پی ٹی آئی کے وکلا نے ملاقات کے بعد سیاسی گفتگو کی، جو اگلی ملاقات کے لیے رکاوٹ ہو سکتی ہے۔

رانا ثنااللہ نے کہا کہ پی ٹی آئی نے لانگ مارچ کی کال دی ہوئی تھی، انہیں سمجھانے کی کوشش کی گئی اور ہر طرح کی یقین دہانی کرائی گئی۔ ملاقاتوں کی بندش اس لیے تھی کہ وہ ان ملاقاتوں کو سیاسی مقاصد کے لیے استعمال کرتے ہیں۔

انہوں نے کہا کہ صوبوں کے معاملے پر ریفرنڈم کرانے کا فیصلہ پارلیمنٹ نے کرنا ہے، یہ معاملہ ابھی تک پارلیمنٹ میں آیا ہی نہیں۔ جب معاملہ پارلیمنٹ میں آئے گا تو پالیسی بیان دیا جائے گا اور بحث ہوگی۔