امریکا کا ایرانی دعویٰ مسترد: بحرین کی جانب دو ڈرون مار گرائے، ایران کا امریکی ڈرون گرانے کا دعویٰ

تہران/واشنگٹن: امریکی سینٹرل کمانڈ (سینٹ کام) نے جمعہ کو ایران کا یہ دعویٰ مسترد کر دیا کہ اس نے بحرین میں امریکی ابتدائی انتباہی ریڈار پر حملہ کیا۔ سینٹ کام کے مطابق پاسداران انقلاب نے بحرین کی جانب دو یک طرفہ حملہ آور ڈرون چھوڑے، جنہیں امریکی افواج نے مار گرایا اور کسی قسم کا جانی یا مالی نقصان نہیں ہوا۔

ایرانی سرکاری میڈیا کے مطابق یہ کارروائی صوبہ ہرمزگان میں ایک ٹیلی کمیونیکیشن ٹاور پر فضائی حملے کے جواب میں کی گئی۔

ادھر پریس ٹی وی کے مطابق ایرانی فوج نے جمعہ کو دعویٰ کیا کہ اس نے ہرمزگان کے علاقے سیرک کے ساحل کے قریب کوہستک کے مقام پر نئے بحری فضائی دفاعی نظام سے امریکی MQ-1 ڈرون مار گرایا۔

ایرانی خبر رساں ادارے ارنا کے مطابق پاسداران انقلاب کے نائب کمانڈر میجر جنرل مصطفیٰ ایزدی نے ایک تقریب میں خبردار کیا کہ کسی بھی جارحیت کا فوری، مؤثر اور فیصلہ کن جواب دیا جائے گا اور ایرانی افواج کے لیے کوئی جغرافیائی حد نہیں۔ ان کے بقول ایران کے مخالفین کے مقاصد میں ملک کی تقسیم، موجودہ حکمرانوں کا خاتمہ، جوہری و میزائل صلاحیت کی کمزوری اور تیل کے وسائل پر قبضہ شامل ہیں۔

یہ پیش رفت ایران اور امریکا کے درمیان تنازع میں عارضی وقفے کے دوران سامنے آئی۔ یہ تنازع 28 فروری کو ایران پر امریکی و اسرائیلی حملوں سے شروع ہوا اور خطے میں پھیل گیا۔ ایران نے خلیجی ممالک میں امریکی اڈوں پر میزائل اور ڈرون حملے کیے اور آبنائے ہرمز میں جہاز رانی محدود کرنے کی کوشش کی، جبکہ واشنگٹن نے ایرانی بندرگاہوں کی بحری ناکہ بندی کر دی۔

ایرانی پاسداران انقلاب کی بحریہ کے مطابق جمعہ کو آبنائے ہرمز میں ایل این جی بردار ٹینکر بارودی سرنگ سے ٹکرا کر دھماکے کا شکار ہوا۔ ایرانی میڈیا کے مطابق جمعرات کو چار آئل ٹینکر بھی دھماکوں کی زد میں آئے۔