ہفتہ وار مہنگائی میں 0.46 فیصد کمی، سالانہ شرح 11.21 فیصد

«اسلام آباد:» ملک میں ہفتہ وار مہنگائی کی شرح میں 0.46 فیصد کمی ریکارڈ کی گئی، جبکہ سالانہ بنیادوں پر مہنگائی کی مجموعی شرح 11.21 فیصد رہی۔

ادارہ شماریات کی جانب سے جاری اعداد و شمار کے مطابق ایک ہفتے کے دوران 19 اشیائے ضروریہ کی قیمتوں میں اضافہ ہوا، 9 اشیا سستی ہوئیں جبکہ 23 اشیا کی قیمتیں مستحکم رہیں۔

ہفتہ وار تبدیلیاں

ایک ہفتے میں ٹماٹر 12.06 فیصد، انڈے 5.98 فیصد اور آلو 2.42 فیصد مہنگے ہوئے۔ لہسن کی قیمت میں 1.76 فیصد اور مرغی کی قیمت میں 1.32 فیصد اضافہ ہوا۔ آٹا 0.94 فیصد اور دال مسور 0.64 فیصد مہنگی ہوئی۔

دوسری جانب پٹرول 7.42 فیصد اور ڈیزل 6.10 فیصد سستا ہوا۔ پیاز کی قیمت میں 1.70 فیصد، کیلے میں 1.03 فیصد اور چینی میں 0.43 فیصد کمی ریکارڈ کی گئی۔ دودھ پاؤڈر اور دال مونگ کی قیمتوں میں بھی معمولی کمی ہوئی۔

سالانہ اعداد و شمار

سالانہ بنیادوں پر ایل پی جی کی قیمت میں 111.35 فیصد اضافہ ریکارڈ کیا گیا۔ ایک سال کے دوران ٹماٹر 78.94 فیصد اور بجلی کے نرخ 52.38 فیصد مہنگے ہوئے۔

آٹے کی قیمت میں 36.14 فیصد، ڈیزل میں 30.77 فیصد اور پٹرول میں 26.23 فیصد اضافہ ہوا۔ پیاز 19.67 فیصد، مٹن 14.67 فیصد، بیف 11.30 فیصد اور چکن 10.98 فیصد مہنگا ہوا۔

بعض اشیا کی قیمتوں میں سالانہ کمی بھی ریکارڈ کی گئی۔ آلو 36.41 فیصد، چینی 24.54 فیصد اور انڈے 23.29 فیصد سستے ہوئے۔