بلوچستان اور خیبرپختونخوا میں کارروائیاں، 74 دہشت گرد ہلاک: آئی ایس پی آر

کوئٹہ: بلوچستان اور خیبرپختونخوا میں سیکیورٹی فورسز کی کارروائیوں کے دوران 74 دہشت گرد ہلاک کر دیے گئے۔ ان کے قبضے سے بھاری مقدار میں اسلحہ، ایمونیشن، گولہ بارود، دھماکہ خیز مواد اور دیسی ساختہ آئی ای ڈیز برآمد کر لی گئیں۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے گزشتہ روز خیبرپختونخوا میں گزشتہ 48 گھنٹوں کے دوران انٹیلی جنس بیسڈ آپریشنز کیے۔ اس دوران خوارج کے متعدد ٹھکانوں کو نشانہ بنایا گیا۔

میر علی میں فتنہ الخوارج کے 35 دہشت گرد ہلاک ہوئے، جبکہ اورکزئی میں کارروائی کے دوران مزید 8 خوارج ہلاک کیے گئے۔ آئی ایس پی آر کے مطابق ان کارروائیوں سے خوارج کے نیٹ ورکس کو بڑا دھچکا پہنچا۔

علاقوں کی کلیئرنس کے دوران بڑی تعداد میں اسلحہ، گولہ بارود اور دھماکہ خیز مواد برآمد ہوا، جس میں دیسی ساختہ دھماکہ خیز مواد اور آئی ای ڈیز بھی شامل ہیں۔

بلوچستان میں دہشت گردوں کے خلاف آپریشنز کے دوران ضلع کوئٹہ کے علاقے کرم میں 3 نومبر سے جاری خفیہ اطلاع پر کارروائیوں میں فتنہ الہندوستان کے 31 دہشت گرد ہلاک کیے جا چکے ہیں۔

آئی ایس پی آر کا کہنا ہے کہ ملک سے دہشت گردی کے خاتمے تک کارروائیاں جاری رہیں گی۔