ترکمانستان سے گوادر تک گیس پائپ لائن منصوبے پر کام کا آغاز

اسلام آباد: پاکستان میں توانائی کے بحران پر قابو پانے اور علاقائی رابطوں کو فروغ دینے کی جانب ایک بڑا قدم اٹھاتے ہوئے ترکمانستان سے گوادر تک گیس پائپ لائن بچھانے کے میگا منصوبے پر کام کا آغاز کر دیا گیا ہے۔
اس سلسلے میں پاکستان کے سرکاری ادارے انٹر اسٹیٹ گیس سسٹمز (ISGS) اور سعودی عرب کی معروف کمپنی ڈیلٹا انرجی سعودی کے درمیان مفاہمتی یادداشت (MoU) پر دستخط ہو گئے ہیں۔
اسپیشل انویسٹمنٹ فیسلیٹیشن کونسل (SIFC) کے زیر اہتمام منعقدہ تقریب کے بعد جاری اعلامیے کے مطابق اس مجوزہ منصوبے پر 25 سے 30 ارب ڈالر کی بھاری سرمایہ کاری کا تخمینہ لگایا گیا ہے۔ تقریب میں ایس آئی ایف سی اور پیٹرولیم ڈویژن کی سینئر قیادت نے شرکت کی۔
یہ گیس پائپ لائن ترکمانستان سے شروع ہو کر افغانستان کے راستے چمن کے قریب پاکستان میں داخل ہوگی اور بلوچستان کے مختلف علاقوں سے گزرتی ہوئی گوادر تک پہنچے گی۔
منصوبے کے تحت گوادر میں ایک جدید ایل این جی (LNG) ٹرمینل بھی قائم کیا جائے گا، جبکہ اگلے مرحلے میں اس پائپ لائن کو ملک کے دیگر حصوں اور عالمی منڈیوں تک توسیع دی جائے گی۔
دونوں فریقین نے منصوبے کی تکنیکی اور معاشی فزیبلٹی کا مشترکہ جائزہ لینے پر اتفاق کیا ہے۔
اعلامیے کے مطابق پیٹرولیم ڈویژن کے ماتحت ادارے آئی ایس جی ایس اور ڈیلٹا انٹرنیشنل گروپ کی ذیلی کمپنی ڈیلٹا انرجی سعودی کے اس اشتراک کا بنیادی مقصد پاکستان کی توانائی کی سلامتی کو مضبوط بنانا، گیس کی سپلائی کے ذرائع کو متنوع کرنا اور خطے میں معاشی و تجارتی رابطوں کو نئی وسعت دینا ہے۔











