طیب اکرام کا نصیر بندہ ہاکی اسٹیڈیم کو ایف آئی ایچ ہائی پرفارمنس سینٹر بنانے کا اعلان

اسلام آباد: انٹرنیشنل ہاکی فیڈریشن کے صدر طیب اکرام نے اپنے دورہ اسلام آباد کے دوران نصیر بندہ ہاکی اسٹیڈیم کو ایف آئی ایچ ہائی پرفارمنس سینٹر کے طور پر ترقی دینے کے منصوبے کا باقاعدہ اعلان کر دیا ہے۔
جاری اعلامیے کے مطابق یہ اہم اقدام پاکستان میں قومی کھیل ہاکی کی بحالی کے لیے انٹرنیشنل ہاکی فیڈریشن کے پختہ عزم کا عکاس ہے۔
سہولیات اور اہداف
اس منصوبے کے تحت کھلاڑیوں کو جدید تربیتی انفراسٹرکچر، عالمی معیار کی کوچنگ، اسپورٹس سائنس، فزیکل فٹنس اور ایلیٹ کھلاڑیوں کی تیاری جیسی جدید سہولیات فراہم کی جائیں گی۔
مجوزہ ہائی پرفارمنس سینٹر ملک بھر سے ابھرتے ہوئے ٹیلنٹ کو نکھارنے، قومی ٹیموں کو مضبوط بنانے اور پاکستان میں طویل مدتی بنیادوں پر ہاکی کی صلاحیتوں کو فروغ دینے کے لیے کلیدی پلیٹ فارم ثابت ہوگا۔
پاکستان ہاکی فیڈریشن نے اس تاریخی پیش رفت پر صدر ایف آئی ایچ طیب اکرام کا شکریہ ادا کیا ہے۔ یہ اقدام عالمی ہاکی میں پاکستان کا کھویا ہوا مقام دوبارہ حاصل کرنے کی جانب ایک اہم سنگ میل ثابت ہوگا۔











