انڈر 19 ایشیا کپ فائنل: بھارتی کھلاڑیوں کے جارحانہ جشن پر کڑی تنقید

مسقط: انڈر 19 ایشیا کپ کے فائنل میں پاکستان کے خلاف جیت کے بعد بھارتی کھلاڑیوں کے جارحانہ جشن اور نامناسب اشاروں پر کرکٹ حلقوں میں کڑی تنقید کی گئی۔
تفصیلات کے مطابق بھارت کی انڈر 19 ٹیم کے کھلاڑیوں نے ایشیا کپ کی فتح کا جشن انتہائی نامناسب انداز میں منایا۔ بھارتی میڈیا نے بھی اس جشن کو جارحانہ قرار دیا، جبکہ سوشل میڈیا پر اسے اسپورٹس مین اسپرٹ کے منافی کہا گیا۔
پاکستان کے خلاف جیت کے بعد بھارتی کرکٹرز آپے سے باہر ہو گئے، گالیاں دیتے رہے اور نامناسب اشارے کرتے رہے۔ بھارت کے خلاف لیگ میچ کے سنچری میکر حمزہ ظہور کے سامنے آ کر بھی بھارتی کرکٹرز نے نامناسب رویہ اختیار کیا۔
بھارتی میڈیا نے اس واقعے کی ویڈیوز اور کھلاڑیوں کے طرزِ عمل کو رپورٹ کیا۔ بھارتی کھلاڑیوں کے نامناسب اشاروں پر سوالات بھی اٹھنے لگے ہیں۔
میدان میں بھارتی ٹیم کے سپورٹ اسٹاف کو کھلاڑیوں کو روکنے اور صورتحال قابو میں لانے کی کوشش کرتے بھی دیکھا گیا۔ سوشل میڈیا صارفین نے بھی بھارتی کھلاڑیوں کے رویے پر تنقید کی اور سوال اٹھایا کہ کامیابی کے جشن میں کھیل کے احترام اور اخلاقیات کو کیوں نظرانداز کیا گیا۔
ایک وکٹ سے کامیابی کے بعد میدان میں ہونے والے ان واقعات کو کھیل کے اخلاقی تقاضوں کے منافی قرار دیا جا رہا ہے۔











