بیرسٹر گوہر کا پیپلز پارٹی سے سیٹیں واپس کرنے کا مطالبہ

سیالکوٹ: چیئرمین پاکستان تحریک انصاف بیرسٹر گوہر نے پیپلز پارٹی سے سندھ، خیبرپختونخوا اور قومی اسمبلی میں اپنی سیٹیں واپس کرنے کا مطالبہ کر دیا۔
میڈیا سے گفتگو کرتے ہوئے بیرسٹر گوہر نے کہا کہ بلاول بھٹو نے تسلیم کیا ہے کہ پی ٹی آئی ایک حقیقت ہے، ہماری سیٹیں ہم سے لے کر دوسری پارٹی میں بانٹی گئیں۔
انہوں نے کہا کہ بانی پی ٹی آئی اور بشریٰ بی بی کے ذاتی معالج کو جانے دیا جائے، تاکہ فیملی کی تسلی ہو۔ بانی پی ٹی آئی کوئی رعایت نہیں مانگ رہے، اپنا حق مانگ رہے ہیں۔
بیرسٹر گوہر نے کہا کہ بانی پی ٹی آئی کے خط کو 72 گھنٹے سے زائد ہو چکے ہیں، چیف جسٹس کو ابھی تک نوٹس لے لینا چاہیے تھا۔ مزید تاخیر نہ کی جائے، کل بانی پی ٹی آئی کے خط کو بطور درخواست سماعت کرکے انہیں ریلیف فراہم کیا جائے۔
چیئرمین پی ٹی آئی نے نئے صوبوں کے معاملے پر کہا کہ کتنے صوبے، کس حال میں اور کہاں کہاں بنیں گے، ابھی خد و خال واضح نہیں۔ اس میں سیاست سے کام نہیں لینا چاہیے، اس پر مشاورت سے رائے تب دیں گے جب کوئی ڈرافٹ آئے گا۔











