ڈی ای او چمن کا اچانک دورہ، بند اسکول پر وضاحت طلب، انکوائری کمیٹی تشکیل

چمن: ڈسٹرکٹ ایجوکیشن آفیسر چمن اشوک کمار راجپوت نے ضلع کے مختلف تعلیمی اداروں کا اچانک دورہ کیا، جہاں تعلیمی سرگرمیوں، اساتذہ کی حاضری، تدریسی عمل، صفائی ستھرائی اور مجموعی انتظامی صورتحال کا تفصیلی جائزہ لیا گیا۔
گورنمنٹ گرلز پرائمری اسکول بند پایا گیا
دورے کے دوران گورنمنٹ گرلز پرائمری اسکول حاجی حبیب اللہ شادیزئی بند پایا گیا اور اسکول کے مرکزی دروازے پر تالا لگا ہوا تھا۔ اس پر ڈی ای او نے شدید برہمی اور ناراضگی کا اظہار کرتے ہوئے اسکول میں تعینات دونوں خواتین اساتذہ کو وضاحت جمع کرانے کی ہدایت جاری کی، جبکہ معاملے میں مزید محکمانہ کارروائی کے لیے کیس اعلیٰ حکام کو ارسال کرنے کا فیصلہ کیا گیا۔
گورنمنٹ مڈل اسکول کلی سیف اللہ خان کا معائنہ
گورنمنٹ مڈل اسکول کلی سیف اللہ خان کے دورے کے موقع پر ڈی ای او نے مختلف کلاس رومز کا معائنہ کیا، طلبہ کی تعلیمی و تدریسی سرگرمیوں اور سیکھنے کے عمل کا جائزہ لیا اور اساتذہ کی حاضری بھی چیک کی۔ اس دوران اسکول میں صفائی ستھرائی کی ناقص صورتحال اور مجموعی انتظامی امور پر سخت تشویش کا اظہار کیا گیا۔
اسکول کے ہیڈ ماسٹر مسٹر عبدالناصر غیر حاضر پائے گئے، جنہیں اس سلسلے میں وضاحت جاری کر دی گئی۔ مزید برآں، اسکول کی مجموعی صورتحال، انتظامی معاملات اور تعلیمی کارکردگی کی جانچ پڑتال کے لیے ڈپٹی ڈسٹرکٹ ایجوکیشن آفیسر قاری عبدالاحد کی سربراہی میں انکوائری کمیٹی تشکیل دے دی گئی، جسے تمام متعلقہ امور کا تفصیلی جائزہ لے کر ایک ہفتے کے اندر رپورٹ پیش کرنے کی ہدایت کی گئی ہے۔
ڈی ای او اشوک کمار راجپوت نے واضح کیا کہ سرکاری تعلیمی اداروں میں اساتذہ کی بروقت حاضری، معیاری تدریسی عمل، صفائی ستھرائی اور نظم و ضبط پر کسی قسم کا سمجھوتہ نہیں کیا جائے گا۔ انہوں نے کہا کہ تعلیمی اداروں کو فعال بنانا، طلبہ کو معیاری تعلیم کی فراہمی یقینی بنانا اور سرکاری فرائض میں غفلت برتنے والے اہلکاروں کے خلاف قواعد و ضوابط کے مطابق محکمانہ کارروائی عمل میں لانا محکمہ تعلیم کی اولین ترجیحات میں شامل ہے۔


تصویر: بشکریہ ڈی جی پی آر بلوچستان











