سیکرٹری اطلاعات عمران خان کے اعزاز میں کوئٹہ میں الوداعی تقریب

کوئٹہ: محکمہ تعلقاتِ عامہ بلوچستان کے زیرِ اہتمام سیکرٹری اطلاعات بلوچستان عمران خان کے تبادلے کے موقع پر ایک باوقار الوداعی تقریب منعقد کی گئی۔ تقریب میں ڈائریکٹر جنرل تعلقاتِ عامہ عسکر خان، ڈائریکٹر تعلقاتِ عامہ سعید احمد شاہوانی اور محکمہ کے افسران و عملے نے شرکت کی۔
تقریب کے دوران سیکرٹری اطلاعات عمران خان اور ڈائریکٹر جنرل عسکر خان کے درمیان خوشگوار ماحول میں گفتگو ہوئی، جس میں محکمہ کی مجموعی کارکردگی، باہمی تعاون، سرکاری امور کی مؤثر انجام دہی اور شعبہ اطلاعات و ابلاغِ عامہ کو مزید فعال اور مؤثر بنانے پر تبادلہ خیال کیا گیا۔
ڈائریکٹر جنرل عسکر خان نے سیکرٹری اطلاعات عمران خان کی محکمانہ خدمات، پیشہ ورانہ رہنمائی، انتظامی معاونت اور محکمہ کے امور میں دلچسپی کو سراہتے ہوئے کہا کہ ان کی سرپرستی اور رہنمائی میں محکمہ نے مختلف اہم امور میں پیش رفت کی۔ انہوں نے کہا کہ سرکاری ذمہ داریوں کے دوران باہمی اعتماد، ٹیم ورک اور ادارہ جاتی ہم آہنگی کسی بھی محکمے کی کامیابی میں کلیدی کردار ادا کرتے ہیں۔
عمران خان نے بھی محکمہ تعلقاتِ عامہ کے افسران اور عملے کی پیشہ ورانہ خدمات، محنت اور تعاون کو سراہتے ہوئے نیک تمناؤں کا اظہار کیا۔ انہوں نے کہا کہ سرکاری اداروں کی مؤثر کارکردگی کے لیے باہمی رابطہ کاری، ذمہ داری اور ٹیم ورک بنیادی اہمیت رکھتے ہیں۔
تقریب کے اختتام پر ڈائریکٹر جنرل عسکر خان نے سیکرٹری اطلاعات عمران خان کو ان کی خدمات کے اعتراف میں یادگاری تحفہ اور شیلڈ پیش کیا اور ان کے لیے مستقبل کی ذمہ داریوں میں کامیابی، ترقی اور نیک خواہشات کا اظہار کیا گیا۔


تصویر: بشکریہ ڈی جی پی آر بلوچستان











