اسپیکر کی زیر صدارت کوئٹہ میں صحت دہلیز منصوبے پر اراکین اسمبلی کو بریفنگ

کوئٹہ: اسپیکر بلوچستان صوبائی اسمبلی و قائم مقام گورنر بلوچستان کی زیرِ صدارت اسمبلی سیکرٹریٹ کے کمیٹی روم میں پیپلز پرائمری ہیلتھ کیئر انیشی ایٹو (PPHI) بلوچستان کے تحت شروع کیے جانے والے جدید ڈیجیٹل نظامِ صحت 'صحت دہلیز' کے بارے میں اراکین صوبائی اسمبلی کو تفصیلی بریفنگ دی گئی۔
اجلاس میں صوبائی وزیر صحت بخت محمد کاکڑ، اراکین صوبائی اسمبلی مولانا ہدایت الرحمان بلوچ، ظفر علی آغا، عبدالمجید بادینی، لیاقت علی لہڑی، کلثوم نیاز بلوچ، زرک خان مندوخیل، ڈاکٹر اشوک کمار، محمد خان لہڑی اور سیکرٹری اسمبلی طاہر شاہ کاکڑ نے شرکت کی۔
منصوبے کے اجزاء اور طریقہ کار
چیف ایگزیکٹو آفیسر پی پی ایچ آئی بلوچستان ڈاکٹر ایم بی راجہ دہریجو نے شرکاء کو منصوبے کے اغراض و مقاصد، طریقہ کار اور عوام کو فراہم کی جانے والی طبی سہولیات کے بارے میں تفصیلی بریفنگ دی۔ بتایا گیا کہ صحت دہلیز ایک جدید اور عوام دوست ڈیجیٹل نظامِ صحت ہے، جس کے ذریعے شہریوں کو 24 گھنٹے مفت ٹیلی میڈیسن کی سہولت فراہم کی جائے گی اور گھر بیٹھے مستند ڈاکٹروں اور مختلف امراض کے ماہرین تک رسائی ممکن بنائی جائے گی۔
منصوبے کے چار بنیادی اجزاء میں ڈاکٹر کی دہلیز تک رسائی، طبی مشاورت اور ڈیجیٹل نسخے کا اجرا، ضرورت کے مطابق مریضوں کا اسپتالوں میں ریفرل اور ادویات کی فراہمی شامل ہیں۔ حکام کے مطابق یہ اپنی نوعیت کا منفرد اقدام ہے، جس کا مقصد خصوصاً دور دراز اور دیہی علاقوں میں رہنے والے افراد کو معیاری طبی سہولیات ان کی دہلیز پر فراہم کرنا ہے۔
چیف ایگزیکٹو آفیسر نے بتایا کہ PPHI میں بھرتیوں کے عمل میں میرٹ کو یقینی بنانے کے لیے پرو میٹرکس (ProMetrics) کا نظام متعارف کرایا گیا ہے، جس کے ذریعے انسانی مداخلت کے بغیر شفاف انداز میں بھرتیوں کا عمل مکمل کیا جا رہا ہے۔ مزید برآں، جن علاقوں میں انٹرنیٹ کی سہولت دستیاب نہیں، وہاں سیٹلائٹ نظام کے ذریعے مریضوں کو ڈاکٹروں سے رابطے اور طبی مشاورت کی سہولت فراہم کرنے کا انتظام کیا گیا ہے۔
صوبائی وزیر صحت بخت محمد کاکڑ نے کہا کہ یہ منصوبہ دیہی اور دور افتادہ علاقوں کے عوام کے لیے انتہائی اہمیت کا حامل ہے، جہاں صحت کی سہولیات تک رسائی ایک بڑا چیلنج ہے۔ انہوں نے کہا کہ منصوبہ ابتدائی طور پر پائلٹ بنیادوں پر شروع کیا گیا ہے، جسے تجربات اور نتائج کی روشنی میں مزید مؤثر اور مستحکم بنایا جائے گا۔
ریفرل نظام اور ہیلتھ کیئر کارڈ
اسپیکر بلوچستان اسمبلی و قائم مقام گورنر نے منصوبے کے مختلف پہلوؤں کا جائزہ لیتے ہوئے مریضوں کو اسپتالوں میں ریفر کرنے کے طریقہ کار پر خصوصی توجہ دینے کی ضرورت پر زور دیا۔ انہوں نے کہا کہ ڈیجیٹل نظامِ صحت کی کامیابی محض طبی مشاورت یا نسخے کے اجرا تک محدود نہیں ہونی چاہیے بلکہ مریض کو بروقت اور مؤثر علاج، مناسب ریفرل اور ادویات کی فراہمی بھی یقینی بنانا ضروری ہے۔
انہوں نے مثال دیتے ہوئے کہا کہ اگر مریض کو محض پیناڈول کی گولی تجویز کرکے ذمہ داری پوری سمجھ لی جائے تو نظام کی افادیت کا حقیقی مقصد حاصل نہیں ہوگا۔ لہٰذا ریفرل کے نظام کو مزید مؤثر اور مربوط بنایا جائے تاکہ مریض کو مکمل طبی سہولت میسر آسکے۔ اسپیکر نے واضح کیا کہ ریفرل کا نظام مضبوط اور قابل اعتماد ہو تو یہ منصوبہ عوام کو حقیقی ریلیف فراہم کرنے کا مؤثر ذریعہ ثابت ہو سکتا ہے۔
انہوں نے متعلقہ حکام سے ہیلتھ کیئر کارڈ کے نظام کے حوالے سے وضاحت طلب کی اور زور دیا کہ ڈیجیٹل طبی سہولیات کو موجودہ صحت کے نظام سے مربوط کیا جائے تاکہ عوام کو زیادہ سے زیادہ فائدہ پہنچ سکے۔
اسپیکر نے کہا کہ موجودہ صوبائی حکومت نے صحت اور تعلیم کے شعبوں میں نمایاں اقدامات کیے ہیں، تاہم حکومتی کارکردگی کا اصل معیار عوام کو حاصل ہونے والی سہولیات اور ان کے مسائل کا عملی حل ہے۔ ان کے مطابق اولین ترجیح عوام کو ریلیف فراہم کرنا ہونی چاہیے اور ہر منصوبے کے ثمرات عام شہری تک پہنچنے چاہئیں۔ جدید ٹیکنالوجی کا حقیقی مقصد بھی یہی ہے کہ سرکاری خدمات کو آسان، شفاف اور عوام کی دہلیز تک پہنچایا جائے۔
انہوں نے پی پی ایچ آئی بلوچستان کی انتظامیہ اور متعلقہ عملے کی کاوشوں کو سراہا اور کہا کہ صحت کے شعبے میں جدید ٹیکنالوجی کا استعمال خوش آئند ہے، تاہم منصوبے کی کامیابی کے لیے اس پر مسلسل نظر ثانی، مؤثر نگرانی اور عملی بہتری ناگزیر ہے۔











