متنی، پشاور میں سی ٹی ڈی اور فورسز کی کارروائی، فتنہ الخوارج کے 3 دہشت گرد ہلاک

متنی، پشاور: سی ٹی ڈی اور پاک فوج نے فتنہ الخوارج کے دہشت گردوں کے خلاف کارروائی میں 3 دہشت گرد ہلاک کر دیے۔ ہلاک دہشت گردوں کی شناخت عبدالرشید، سعید اللہ اور سعید نواب کے ناموں سے ہوئی ہے۔
دہشت گرد سرکاری تنصیبات پر حملوں اور پاکستان کی سالمیت کو نقصان پہنچانے کی منصوبہ بندی کر رہے تھے۔ مصدقہ اطلاع پر پاسانی روڈ ادیزی خوڑ متنی میں سی ٹی ڈی کی ایس ڈبلیو اے ٹی ٹیموں اور پاک فوج کے جوانوں نے گھات لگائی۔ دہشت گردوں نے فورسز کو دیکھتے ہی شدید فائرنگ شروع کر دی، جس کے جواب میں جوانوں نے مؤثر جوابی فائرنگ کی۔
فائرنگ کا تبادلہ رکنے کے بعد سرچ آپریشن کے دوران 3 دہشت گردوں کی لاشیں برآمد ہوئیں، جبکہ دیگر دہشت گرد رات کی تاریکی اور جھاڑیوں کا فائدہ اٹھا کر فرار ہو گئے۔ ان کے قبضے سے 2 کلاشنکوف، ایک پستول، 3 ہینڈ گرنیڈ، 5 میگزین اور قومی شناختی کارڈز برآمد ہوئے۔ فرار دہشت گردوں کی گرفتاری کے لیے سرچ آپریشن جاری ہے۔
وزیراعظم شہباز شریف اور وزیر داخلہ محسن نقوی نے کارروائی پر سیکیورٹی فورسز کو خراج تحسین پیش کیا۔ وزیراعظم نے کہا کہ سیکیورٹی فورسز کی کارروائیاں قومی عزم اور حوصلے کی عکاس ہیں، اور حکومت دہشت گردی کے مکمل خاتمے کے لیے پرعزم ہے۔
انسپکٹر جنرل آف پولیس خیبر پختونخوا ذوالفقار حمید اور ایڈیشنل انسپکٹر جنرل آف پولیس، سی ٹی ڈی نے عزم ظاہر کیا کہ دہشت گردوں کو ان کے مذموم مقاصد میں کامیاب نہیں ہونے دیا جائے گا۔











