حکومت اور جماعت اسلامی میں پٹرولیم ریلیف پر اتفاق، سبسڈی کا دائرہ وسیع

اسلام آباد: حکومت اور جماعت اسلامی کے درمیان پٹرولیم مصنوعات کی قیمتوں میں ریلیف اور سبسڈی کے معاملے پر اہم پیش رفت ہوئی ہے۔ دونوں فریقوں کے درمیان سبسڈی کا دائرہ وسیع کرنے کے فارمولے پر اتفاق ہو گیا ہے۔
مجوزہ فارمولا
مجوزہ فارمولے کے تحت ایک ہزار سی سی تک کی گاڑیوں اور 12 ایکڑ تک اراضی رکھنے والے کاشتکاروں کے ٹریکٹرز کو بھی سبسڈی کی سہولت فراہم کی جائے گی۔ جماعت اسلامی نے تجویز دی تھی کہ ریلیف کا دائرہ محدود رکھنے کے بجائے مزید طبقات کو شامل کیا جائے، جسے حکومت نے وزیراعظم کے ذریعے تسلیم کر لیا ہے۔
اس فارمولے کے حتمی نفاذ اور طریقہ کار سے متعلق باضابطہ اعلان ابھی باقی ہے۔
ملاقات اور لانگ مارچ
وزیراعظم شہباز شریف اور امیر جماعت اسلامی حافظ نعیم الرحمان کے درمیان جلد ملاقات متوقع ہے۔ ذرائع کے مطابق حکومت نے پٹرولیم لیوی میں ممکنہ حد تک کمی کرنے کا عندیہ بھی دیا ہے۔ ملاقات میں ریلیف پیکیج، سبسڈی کے فارمولے اور پٹرولیم لیوی میں کمی پر حتمی پیش رفت متوقع ہے۔
مذاکرات کے باعث جماعت اسلامی نے اسلام آباد کی جانب لانگ مارچ عارضی طور پر روک دیا ہے۔ وزیراعظم کے دورہ منصورہ کے امکانات پر بھی غور شروع کیا گیا ہے۔ ذرائع کے مطابق وزیراعظم کے دورہ منصورہ اور پٹرولیم لیوی میں کمی کے باضابطہ اعلان کے بعد جماعت اسلامی احتجاج کی کال واپس لینے کا فیصلہ کر سکتی ہے، اور لانگ مارچ ختم کرنے کا اعلان بھی متوقع ہے۔











