قلات: ڈپٹی کمشنر عائشہ زہری کی صدارت میں پولیو مہم کے جائزہ اجلاس میں کم کارکردگی پر غور
قلات: ڈپٹی کمشنر انجینئر عائشہ زہری کی زیرِ صدارت پولیو پوسٹ کمپین SNID ریویو میٹنگ منعقد ہوئی۔ اجلاس میں ڈسٹرکٹ ہیلتھ آفیسر ڈاکٹر عبدالمالک، ڈی ایم پی پی ایچ آئی زین العابدین، ڈسٹرکٹ ایجوکیشن آفیسر نثار احمد نورزئی، تحصیلدار خالق آباد امجد علی سمیت محکمہ صحت کے افسران، ڈبلیو ایچ او کے نمائندوں اور دیگر متعلقہ حکام نے شرکت کی۔
اجلاس میں گزشتہ پولیو مہم کے دوران ٹیموں کی کارکردگی، درپیش مسائل، کم کارکردگی کا مظاہرہ کرنے والی یونین کونسلز (Low Performance UCs)، فنگر مارکنگ اور بچوں کی عدم دستیابی سمیت دیگر اہم امور کا تفصیلی جائزہ لیا گیا۔ اس موقع پر کم کارکردگی کی وجوہات کا تعین کرتے ہوئے آئندہ پولیو مہم کو مزید مؤثر اور کامیاب بنانے کے لیے جامع حکمتِ عملی پر بھی تبادلہ خیال کیا گیا۔
ڈپٹی کمشنر انجینئر عائشہ زہری نے کہا کہ پولیو ایک موذی مرض ہے، جس کے خاتمے کے لیے جدوجہد کرنا ہم سب کی مشترکہ ذمہ داری ہے۔ انہوں نے کہا کہ بچوں کو عمر بھر کی معذوری سے محفوظ رکھنے کے لیے پولیو مہم کو کامیاب بنانا ناگزیر ہے۔
اس مقصد کے لیے ضلعی انتظامیہ، محکمہ صحت اور عالمی ادارہ صحت (WHO) باہمی تعاون اور مشترکہ کوششیں جاری ہیں۔











