برشور میں دینی مدارس کی رجسٹریشن کا عمل تیز، علما کرام کی مکمل تعاون کی یقین دہانی
برشور: 18 نومبر۔ ڈپٹی کمشنر برشور فلائٹ لیفٹیننٹ (ر) خالد شمس کی خصوصی ہدایات پر ضلع بھر کے دینی مدارس کی رجسٹریشن کا عمل تیز کر دیا گیا ہے۔
اس سلسلے میں مقامی علما کرام اور مہتممینِ مدارس کے ایک نمائندہ وفد نے اسسٹنٹ کمشنر برشور سید رضی ہریرہ سے ان کے دفتر میں ملاقات کی۔
حکومتی پالیسی کے مطابق رجسٹریشن
ملاقات کے دوران اسسٹنٹ کمشنر سید رضی ہریرہ نے وفد کو بتایا کہ وفاقی اور صوبائی حکومت کی پالیسی کے مطابق اور ڈپٹی کمشنر کے احکامات کی روشنی میں تمام غیر رجسٹرڈ مدارس کو مروجہ قوانین اور بلوچستان چیریٹیز اتھارٹی کے طریقہ کار کے تحت رجسٹر کیا جا رہا ہے۔
انہوں نے کہا کہ رجسٹریشن کا مقصد مدارس کو قانونی تحفظ اور سرکاری سہولیات فراہم کرنا ہے، جس کے لیے ضلعی انتظامیہ دستاویزات کی جانچ پڑتال سمیت تمام مراحل میں ہر ممکن تعاون کرے گی۔
علما کرام کی یقین دہانی
اس موقع پر وفد میں شامل علما کرام اور مہتممینِ مدارس نے ضلعی انتظامیہ کے مثبت اقدام کو سراہتے ہوئے مکمل تعاون کی یقین دہانی کرائی۔
علما کرام نے اس عزم کا اظہار کیا کہ دینی مدارس قانون کی بالادستی پر یقین رکھتے ہیں اور باہمی مشاورت کے ذریعے تمام مدارس کی بروقت رجسٹریشن کو یقینی بنایا جائے گا۔











