صدر زرداری کا فلسطینی اعلانِ آزادی کی سالگرہ پر فلسطین کی حمایت کا اعادہ

اسلام آباد: صدر مملکت آصف علی زرداری نے ریاست فلسطین کے اعلانِ آزادی کی 38ویں سالگرہ پر فلسطین کے صدر محمود عباس اور عوام کو دلی مبارکباد پیش کی ہے۔ انہوں نے فلسطینی عوام کے جائز حقوق، بالخصوص حق خودارادیت کے لیے پاکستان کی غیرمتزلزل حمایت کا اعادہ کیا۔
فلسطینی صدر محمود عباس کے نام اپنے خط میں صدر زرداری نے کہا کہ پاکستان اور فلسطین کے درمیان مشترکہ تاریخ، باہمی اعتماد، یکجہتی اور مشترکہ امنگوں پر مبنی قریبی برادرانہ تعلقات استوار ہیں۔
انہوں نے کہا کہ پاکستان کے عوام فلسطینی عوام کو انتہائی احترام کی نگاہ سے دیکھتے ہیں اور دونوں ممالک کے درمیان دوستی اور بھائی چارے کے رشتوں کو مزید تقویت دینے کے لیے نہایت پرعزم ہیں۔
صدر آصف علی زرداری نے اقوام متحدہ کی متعلقہ قراردادوں کے مطابق 1967 سے پہلے کی سرحدوں کی بنیاد پر آزاد، خودمختار، قابلِ عمل اور ملحقہ ریاست فلسطین کے قیام کے لیے پاکستان کی پختہ اور اصولی حمایت کا اعادہ کیا، جس کا دارالحکومت القدس الشریف ہو۔
انہوں نے فلسطینی عوام کو درپیش مسلسل مصائب کے تناظر میں ان کے ساتھ پاکستان کی یکجہتی کا اعادہ کیا اور پائیدار امن، آزادی اور وقار کے لیے ان کی امنگوں کی حمایت کا اظہار کیا۔











