راولپنڈی ٹیسٹ: 6 ہزار پولیس اہلکار سیکیورٹی اور ٹریفک ڈیوٹی پر تعینات

راولپنڈی: راولپنڈی کرکٹ اسٹیڈیم میں پاکستان اور سری لنکا کے درمیان جاری ٹیسٹ میچ کے چوتھے روز سی پی او حسن مشتاق سکھیرا کی ہدایت پر راولپنڈی پولیس کی جانب سے سیکیورٹی اور ٹریفک کے فول پروف انتظامات کیے گئے ہیں۔

تقریباً 6 ہزار افسران و اہلکار سیکیورٹی اور ٹریفک ڈیوٹی پر تعینات ہیں، جبکہ سینئر افسران فیلڈ میں موجود رہ کر ڈیوٹی پر مامور فورس کو چیک اور بریف کر رہے ہیں۔

اسٹیڈیم کے اطراف روف ٹاپس پر سنائپرز تعینات کیے گئے ہیں، جبکہ سیف سٹی اور دیگر سی سی ٹی وی کیمروں کے ذریعے لمحہ بہ لمحہ نگرانی جاری ہے۔

مؤثر مانیٹرنگ کے لیے خصوصی کنٹرول روم بھی قائم کیا گیا ہے، اور تھانوں کی موبائلز، ایلیٹ فورس اور ڈولفن اسکواڈ اسٹیڈیم کے گردونواح میں مسلسل گشت کر رہے ہیں۔

سی پی او حسن مشتاق سکھیرا کے مطابق شہریوں کی سہولت اور ٹریفک کی روانی برقرار رکھنے کے لیے جامع ٹریفک پلان نافذ کیا گیا ہے اور ٹیسٹ میچ کے پرامن انعقاد کے لیے سیکیورٹی کے بہترین انتظامات یقینی بنائے جا رہے ہیں۔