شفقت امانت علی کے نئے موسیقی سفر کا اعلان، آج کراچی میں پریس کانفرنس ہوگی

کراچی: پاکستان کے نامور گلوکار شفقت امانت علی کے فنی سفر کے نئے باب کے آغاز کے حوالے سے آج بروز منگل، 17 نومبر 2026 کو کراچی میں اہم پریس کانفرنس منعقد ہوگی۔
شفقت امانت علی اور کینیز میوزک کے اشتراک سے ہونے والی یہ پریس کانفرنس سہ پہر 3 بجے آواری ٹاورز کے انڈس سوئیٹ میں منعقد کی جائے گی۔
اس موقع پر شفقت امانت علی، کینیز گروپ کی چیف ایگزیکٹو آفیسر ایگنس کینی اور میوزک ڈائریکٹر احسن باری خطاب کریں گے، جبکہ کینیز میوزک کے میوزک کنسلٹنٹ فواد ندیم نظامت کے فرائض انجام دیں گے۔
پریس کانفرنس میں سوال و جواب کا سیشن بھی ہوگا، جس کے دوران شفقت امانت علی کے آئندہ کنسرٹس کے منصوبوں اور شیڈول سے متعلق تفصیلات بتائی جائیں گی۔
ابتدائی طور پر کراچی میں کنسرٹ منعقد کرنے کا منصوبہ ہے، جس کے بعد اسلام آباد اور لاہور میں بھی موسیقی کے پروگرام پیش کیے جائیں گے۔
اس موقع پر گلوکار کی صحت، جاری علاج اور دیکھ بھال سے متعلق تازہ ترین صورتحال سے بھی آگاہ کیا جائے گا۔
اس کے علاوہ شفقت امانت علی کی ذاتی زندگی، ہمت و استقامت اور موسیقی کے سفر و ورثے پر مبنی زیرِ تکمیل دستاویزی فلم کے حوالے سے اہم تفصیلات بھی شیئر کی جائیں گی۔











