حب میں وفاقی محکموں کی بھرتی کے انٹرویوز شروع، ڈپٹی کمشنر کی نگرانی
حب: وفاقی محکموں میں مختلف آسامیوں پر بھرتی کے سلسلے میں امیدواروں کے انٹرویوز کا آغاز آج صبح 9 بجے ٹیکنیکل ٹریننگ سینٹر (ٹی ٹی سی) حب میں ہو گیا۔ انٹرویوز کا عمل منظم ماحول میں جاری ہے، جس کے لیے ضلعی انتظامیہ حب کی جانب سے تمام انتظامات مکمل کیے گئے ہیں۔
ڈسٹرکٹ ایڈمنسٹریشن کے جاری کردہ ٹیسٹ انٹرویو شیڈول کے مطابق آج ضلع خضدار سے تعلق رکھنے والے امیدواروں کے انٹرویوز لیے جا رہے ہیں، جبکہ تمام انٹرویو پینلز فعال ہیں اور انٹرویوز کا عمل تسلی بخش منظم انداز میں جاری ہے۔
چیف سیکرٹری بلوچستان شکیل قادرخان اور وزیراعلیٰ بلوچستان سرفراز بگٹی کی ہدایت پر ڈپٹی کمشنر حب کیپٹن (ر) جمعہ داد خان مندوخیل کی خصوصی نگرانی میں ضلعی انتظامیہ کی جانب سے امیدواروں اور انٹرویو پینلز کی سہولت کے لیے جامع انتظامات کیے گئے ہیں۔
اس سلسلے میں تمام پینلز کو ضروری فرنیچر، نشستوں، لیپ ٹاپس، معاون عملے اور کلریکل اسٹاف سمیت دیگر سہولیات فراہم کی گئی ہیں تاکہ انٹرویوز کا عمل بلا تعطل جاری رکھا جا سکے۔
ڈپٹی کمشنر حب خود انٹرویو کے عمل کی نگرانی اور مانیٹرنگ کر رہے ہیں تاکہ بھرتیوں کے تمام مراحل میں شفافیت، میرٹ اور انتظامی نظم و ضبط کو یقینی بنایا جا سکے۔ امیدواروں اور انٹرویو ٹیموں کی حفاظت کے لیے فول پروف سیکیورٹی انتظامات بھی کیے گئے ہیں۔
انٹرویوز کا شیڈول
حب ریجن میں امیدواروں کے انٹرویوز کے شیڈول کے مطابق 22 نومبر 2026 کو ضلع خضدار کے نوجوانوں کے ٹیسٹ انٹرویوز منعقد ہو رہے ہیں، جبکہ 23 نومبر کو حب اور وڈھ، 24 نومبر کو ضلع لسبیلہ اور 25 نومبر کو ضلع آواران کے امیدواروں کے ٹیسٹ انٹرویوز ہوں گے۔
ضلعی انتظامیہ حب کے مطابق بھرتیوں کے عمل کو شفاف، منصفانہ اور میرٹ کی بنیاد پر مکمل کرنے کے لیے تمام دستیاب وسائل بروئے کار لائے جا رہے ہیں، جبکہ امیدواروں کو یکساں مواقع اور سہولیات کی فراہمی کو بھی یقینی بنایا جا رہا ہے۔











