شنگھائی امپورٹ ایکسپو: چین کا دنیا کے ساتھ مواقع بانٹنے کا عزم

بیجنگ: شنگھائی میں منعقدہ نویں چائنا انٹرنیشنل امپورٹ ایکسپو (سی آئی آئی ای) میں 162 ممالک، خطوں اور بین الاقوامی تنظیموں کے 4,142 غیر ملکی کاروباری اداروں نے شرکت کی، جو پیمانے کے لحاظ سے اس نمائش کا تاریخی ریکارڈ ہے۔

ان میں تقریباً 200 کمپنیاں ایسی تھیں جنہوں نے پہلی نمائش سے نویں تک تمام سی آئی آئی ای میں حصہ لیا۔ 2,000 سے زائد کمپنیوں کی یہ اس نمائش میں پہلی شرکت تھی اور 480 سے زائد مصنوعات پہلی بار پیش کی گئیں۔

اس سے واضح ہوتا ہے کہ دنیا چینی منڈی کے حجم کے ساتھ اس کی اختراعی صلاحیت، مستحکم توقعات اور اشتراک کی منطق کو بھی پہچان رہی ہے۔

اختراعی صلاحیت اور ٹیکنالوجی

چینی منڈی کی پہلی کشش اس کا اختراعی میدان ہے۔ عالمی دانشورانہ املاک کی تنظیم کی عالمی اختراعی اشاریہ رپورٹ 2026 کے مطابق چین مسلسل دو برس سے عالمی درجہ بندی میں دسویں نمبر پر ہے، اور اس کے 25 عالمی درجے کے اختراعی کلسٹرز چار برس سے مسلسل پہلے نمبر پر ہیں۔

رواں سال کی امپورٹ ایکسپو میں مصنوعی ذہانت، اسمارٹ مینوفیکچرنگ، سبز ٹیکنالوجی، جدید ادویات اور اعلیٰ آلات کا تناسب نمایاں طور پر بڑھا ہے۔ غیر ملکی کمپنیاں اب صرف تیار شدہ مصنوعات نہیں لاتیں بلکہ چینی ضروریات کے مطابق مقامی تحقیق و ترقی، مشترکہ اختراع اور پیداواری صلاحیت کا رخ اختیار کر رہی ہیں۔

اوپن سورس ماڈلز سے ایمبیڈڈ انٹیلی جنس تک، چین اپنی اختراعی صلاحیت کو ایک ایسی عوامی تکنیکی بنیاد میں بدل رہا ہے جس تک دنیا آسانی سے رسائی حاصل کر سکے۔

رواں سال جنوری سے ستمبر تک اعلیٰ ٹیکنالوجی کے شعبے میں غیر ملکی سرمائے کا حقیقی استعمال 228.53 ارب یوآن رہا، جو گزشتہ سال کی اسی مدت کے مقابلے میں 33.8 فیصد زیادہ ہے۔ یہ ملک بھر میں غیر ملکی سرمائے کے حقیقی استعمال کا 41.6 فیصد ہے، جو گزشتہ سال کے مقابلے میں 11.9 فیصد پوائنٹس زیادہ ہے۔

طویل المدتی منصوبہ بندی اور اشتراک

دوسری کشش طویل المدتی منصوبہ بندی سے پیدا ہونے والی مستحکم توقعات ہیں۔ پندرہویں پانچ سالہ منصوبے میں چائنا انٹرنیشنل امپورٹ ایکسپو، کینٹن فیئر اور چائنا انٹرنیشنل فیئر فار ٹریڈ ان سروسز سمیت بڑی ایکسپوز کو جاری رکھنے، غیر ملکی سرمایہ کاری کے لیے منفی فہرست کو مزید کم کرنے، سرحد پار خدمات کی تجارت کا انتظام بہتر بنانے اور غیر ملکی سرمایہ کاری کے نظام کی اصلاح کی واضح بات کی گئی ہے۔

چین نے کثیر سطحی نمائشی نظام قائم کیا ہے۔ کینٹن فیئر مالیاتی تجارت کے ربط پر توجہ دیتا ہے، چائنا انٹرنیشنل امپورٹ ایکسپو معیاری درآمد کو فروغ دیتی ہے، چائنا انٹرنیشنل فیئر فار ٹریڈ ان سروسز خدماتی شعبے پر توجہ مرکوز کرتی ہے، چائنا انٹرنیشنل فیئر فار انویسٹمنٹ اینڈ ٹریڈ دوطرفہ سرمایہ کاری کو آگے بڑھاتی ہے، جبکہ چائنا انٹرنیشنل سپلائی چین ایکسپو صنعتی چین کی روانی اور عالمی انٹرنیٹ کانفرنس ڈیجیٹل و مصنوعی ذہانت کے اوپن سورس تعاون کو فروغ دیتی ہے۔ ان پلیٹ فارمز کے افعال آپس میں جڑے ہوئے ہیں اور یہ نمائش کے محدود دورانیے سے نکل کر تعاون کے ایک پورے سلسلے تک پھیل گئے ہیں۔

کارگلز ایگریکلچر اینڈ ٹریڈنگ ایشیا پیسیفک گروپ کی صدر پین کیہل کا کہنا ہے کہ چین کا واضح پانچ سالہ منصوبہ پالیسی کی مستحکم توقعات لاتا ہے، اور پالیسی کی سمت واضح ہو تو مارکیٹ بھی پراعتماد قدم بڑھاتی ہے۔

اس استحکام کی ایک گہری بنیاد چین کا مضبوط نظامِ حکمرانی بھی ہے۔ کمیونسٹ پارٹی آف چائنا کی بیسویں مرکزی کمیٹی کا پانچواں کل رکنی اجلاس پارٹی کی جامع اور سخت سیلف گورننس پر ثابت قدمی سے عمل درآمد، پارٹی کے چیلنجز کا سامنا کرنے، خود اصلاحی اور نگرانی و انسدادِ بدعنوانی کے نظام کو بہتر بنانے پر مرکوز رہا۔

کئی ممالک کے اہم میڈیا اور تھنک ٹینکس نے نشاندہی کی کہ یہ سوچ چینی طرز کی جدیدیت کے لیے سیاسی بنیاد کو مضبوط کرتی ہے اور گلوبل ساؤتھ کے ممالک کے لیے حکمرانی و انتظام کا ایک حوالہ بھی ہے۔ پاکستان کے معروف جریدے ڈپلومیٹک انسائٹ میں شائع ایک مضمون میں کہا گیا ہے کہ کمیونسٹ پارٹی آف چائنا کی مسائل کی مسلسل نشاندہی اور انہیں حل کرنے کی صلاحیت چین کی جدیدیت کے عمل میں ایک اہم سیاسی برتری ہے۔

پارٹی کی تعمیر کو مشترکہ خوشحالی، سائنسی و تکنیکی ترقی اور عوامی فلاح و بہبود سمیت ترقیاتی اہداف کے ساتھ گہرائی سے مربوط کرنے سے بین الاقوامی شراکت داروں کا اعتماد بڑھے گا۔ عالمی برادری کے ساتھ ترقیاتی مواقع کا اشتراک محض ایک فعال دعوت نہیں بلکہ عملی اقدام بھی ہے۔

برآمدات اور ترقیاتی مواقع

ہونگ چھیا انٹرنیشنل اکنامک فورم کی جاری کردہ چین کو برآمدات کی صلاحیت کی ترقی کی رپورٹ کے مطابق 2020 سے 2025 کے دوران چین کو کی جانے والی عالمی برآمدات مسلسل بڑھی ہیں۔ رپورٹ کے مطابق چین کی درآمدات کا دائرہ صنعتی مصنوعات تک محدود رہنے کے بجائے وسیع اور متنوع ہو چکا ہے، جس میں توانائی، خام مال اور زرعی اجناس بھی شامل ہیں۔ اس دوران اعلیٰ معیار کی مصنوعات اور بنیادی اشیا، دونوں کی درآمدات میں اضافہ ہوا ہے۔

چین کی وسیع مارکیٹ جدید صنعتی مصنوعات کی طلب پیدا کرتی ہے اور قدرتی وسائل پر مبنی مصنوعات اور مخصوص زرعی اجناس کے لیے بھی مواقع فراہم کرتی ہے۔ اس سے مختلف ممالک کو اپنی منفرد صلاحیتوں سے استفادہ کرتے ہوئے ترقی کے نئے راستے تلاش کرنے کا موقع ملتا ہے۔

یہ چین کی جانب سے گلوبل ڈیولپمنٹ انیشی ایٹو پر عمل درآمد اور باہمی مفادات پر مبنی تعاون پر ثابت قدم رہنے کا ایک عملی تجربہ ہے، جس سے ایک بار پھر اس بات کی تصدیق ہوتی ہے کہ چین کے ساتھ چلنا ہی مواقع کے ساتھ آگے بڑھنا ہے۔