امریکی وزیرِ دفاع ہیگسیتھ کے خلاف ایوانِ نمائندگان میں مواخذے کی قرارداد پر ووٹنگ آج

واشنگٹن: امریکی ایوانِ نمائندگان میں وزیرِ دفاع پیٹ ہیگسیتھ کے خلاف مواخذے کی قرارداد پر آج مقامی وقت کے مطابق شام ساڑھے پانچ بجے ووٹنگ ہوگی۔ قرارداد ریپبلکن رکنِ کانگریس تھامس میسی نے پیر کو پیش کی۔

میسی کا مؤقف ہے کہ ہیگسیتھ نے کانگریس کی منظوری کے بغیر ایران کے خلاف جنگی کارروائی شروع کر کے قانون توڑا۔ ان کے مطابق 1973 کے وار پاورز ریزولوشن کے تحت کانگریس کی اجازت نہ ہو تو فوجی کارروائی 60 دن میں ختم ہونی چاہیے، جبکہ ایران کے خلاف جنگ کو 256 دن ہو چکے ہیں۔

ہیگسیتھ نے مواخذے کی کوششوں کو ’تماشا‘ اور ’سیاسی ڈرامہ‘ قرار دیا۔ ان کا کہنا ہے کہ وینزویلا اور ایران میں فوجی کارروائیاں قانونی تھیں، کمانڈر اِن چیف کے حکم پر ہوئیں اور کانگریس کو آگاہ کیا گیا۔ صدر ڈونلڈ ٹرمپ نے ٹروتھ سوشل پر ان کی حمایت کی اور میسی کو ’مکمل ناکام شخص‘ کہا۔

وزیرِ خارجہ مارکو روبیو اور ایوان کے ریپبلکن سپیکر مائیک جانسن بھی مواخذے کے مخالف ہیں۔ ڈیموکریٹ رہنما حکیم جیفریز نے حمایت کا اعلان کرتے ہوئے ہیگسیتھ پر اختیارات کے غلط استعمال اور ایران کے خلاف مہنگی اور غیر ضروری جنگ کا الزام لگایا۔ سینیٹر کرس کونز کا کہنا تھا کہ صدر نے نہ ہٹایا تو کانگریس ہٹائے گی۔

روئٹرز نے کانگریس ذرائع کے حوالے سے بتایا ہے کہ قرارداد کی منظوری کے لیے ممکنہ طور پر مطلوبہ ووٹ موجود ہیں۔ سی بی ایس کے مطابق اسے دونوں جماعتوں کے ارکان کی حمایت مل سکتی ہے۔ ایوان میں سادہ اکثریت سے قرارداد منظور ہو جائے تو بھی عہدیدار فوری طور پر نہیں ہٹتا اور معاملہ سینیٹ جاتا ہے۔

روئٹرز کے مطابق سینیٹ میں ہیگسیتھ کو ہٹانے کے لیے دو تہائی اکثریت درکار ہوگی، جبکہ 100 رکنی ایوان میں ریپبلکن پارٹی کے پاس 53 نشستیں ہیں، اس لیے اس کا امکان کم ہے۔ ڈیموکریٹس تین جنوری کو ایوان کا کنٹرول سنبھالیں گے۔