ایران اپنے قومی مفادات پر کوئی سمجھوتا نہیں کرے گا، اسماعیل بقائی

تہران: ایرانی وزارت خارجہ کے ترجمان اسماعیل بقائی نے کہا ہے کہ ایران کا دو روزہ منصوبہ بہت معقول تجاویز پر مبنی ہے۔

میڈیا رپورٹس کے مطابق ترجمان نے تہران میں پریس بریفنگ کے دوران کہا کہ ایرانی حقوق کے مطالبے کو امریکا غیرمعقول سمجھتا ہے، جبکہ مذاکرات شروع ہونے سے پہلے پابندیاں اور بحری ناکہ بندی ختم کرنے کا مطالبہ ہرگز غیرمعقول نہیں۔ ان کے مطابق غیرمعقول اقدام تو مذاکرات کے دوران جنگ شروع کرنا ہے۔

اسماعیل بقائی نے کہا کہ ایران اپنے قومی مفادات پر کوئی سمجھوتا نہیں کرے گا۔ امریکا ایران کے مطالبات مان لیتا ہے تو آبنائے ہرمز میں سیکیورٹی بحال ہو جائے گی۔

ان کا کہنا تھا کہ امریکی آئرن گیٹ ٹاسک فورس امریکا کے وسط مدتی انتخابات کے نتائج سے توجہ ہٹانے کے لیے ہے۔ امریکا کو سمجھ جانا چاہیے کہ جنگ کی حمایت کتنی مہنگی پڑتی ہے۔