آبنائے ہرمز میں بارودی سرنگوں سے دو آئل ٹینکروں میں آگ لگنے کا دعویٰ

تہران: ایران کے پاسدارانِ انقلاب کی بحریہ کا دعویٰ ہے کہ آبنائے ہرمز میں دو آئل ٹینکر بحری بارودی سرنگوں سے ٹکرانے کے بعد آگ کی لپیٹ میں آ گئے۔

پاسدارانِ انقلاب کی بحریہ کے بیان کے مطابق دونوں ٹینکر آبنائے ہرمز میں اس راستے سے گزر رہے تھے جسے ایران نے غیر مجاز قرار دیا ہے۔ اسی دوران وہ بارودی سرنگوں سے ٹکرا گئے، جس کے نتیجے میں ان میں آگ بھڑک اٹھی۔

بیان میں ٹینکروں کے نام، ان کی ملکیت، آگ لگنے کے بعد کی صورتِ حال یا ممکنہ جانی نقصان سے متعلق کوئی تفصیل فراہم نہیں کی گئی۔ تاحال اس واقعے کی آزادانہ تصدیق سامنے نہیں آئی اور نہ ہی متعلقہ بحری جہازوں یا دیگر حکام کی جانب سے فوری طور پر کوئی تفصیلی بیان جاری کیا گیا ہے۔