بلاول بھٹو کا وزیراعظم سے مطالبہ: پہلے اتحادیوں کو اعتماد میں لیں، اپوزیشن سے نئے جھگڑے نہ چھیڑیں

کراچی: پاکستان پیپلز پارٹی کے چیئرمین بلاول بھٹو زرداری نے کہا ہے کہ وزیراعظم کو سب سے پہلے اپنے اتحادیوں کو اعتماد میں لینا چاہیے اور اپوزیشن کے ساتھ نئے جھگڑے چھیڑنے کے بجائے افہام و تفہیم سے کام لینا چاہیے۔

وہ وزیراعلیٰ ہاؤس میں سندھ پیپلز ہاؤسنگ فار فلڈ ری ہیبیلیٹیشن (SPHF) کے تحت 10 لاکھ گھروں کی تکمیل کی تقریب سے خطاب کر رہے تھے۔

بلاول بھٹو کے مطابق منصوبے کا آغاز قدرتی آفت سے ہوا، تاہم اس سے بیروزگاری کے دوران لوگوں کو معاشی تحفظ بھی ملا۔ انہوں نے دعویٰ کیا کہ 10 لاکھ گھروں کی تعمیر کے ساتھ اتنے ہی روزگار کے مواقع بھی پیدا ہوئے۔

انہوں نے کہا کہ بلوچستان میں گھر بنانے کی ذمہ داری وفاقی حکومت نے لی تھی اور وہاں تین سال میں 30 ہزار گھر بنے، جبکہ سندھ حکومت نے تین سال میں 10 لاکھ گھر بنائے۔ ان کا کہنا تھا کہ عالمی اداروں سے بات چیت کے دوران وفاقی حکومت صوبائی حکومت کو نااہل قرار دے کر رقم خود مانگ رہی تھی۔ انہوں نے ورلڈ بینک کا شکریہ ادا کیا کہ اس نے سندھ حکومت پر اعتماد کیا۔

بلاول بھٹو نے وزیراعلیٰ سندھ سے کہا کہ وہ عالمی اداروں کو منصوبے کے آڈٹ کی دعوت دیں۔ انہوں نے دعویٰ کیا کہ اس منصوبے میں کرپشن نہیں ہوئی۔

انہوں نے کہا کہ ملک کو معاشی آفت کا سامنا ہے اور اس سے نمٹنے کے لیے سیاست کو ری سیٹ کرنا ہوگا، جس کے لیے تمام جماعتوں کو لڑنے کے بجائے مل کر کام کرنا ہوگا۔ ان کے بقول حکومت اور اپوزیشن کے مل کر کام کیے بغیر عوام کو ریلیف ملنا ممکن نہیں۔

بلاول بھٹو نے وزیراعظم شہباز شریف کا شکریہ ادا کیا اور بتایا کہ وزیراعظم سے ملاقات میں تمام کام مل کر کرنے پر اتفاق ہوا ہے۔ انہوں نے یہ بھی کہا کہ یہ منصوبہ 1970 کے بعد زمین کی منتقلی کا سب سے بڑا منصوبہ ہے اور گھروں کے ساتھ زمین کی ملکیت خواتین کو دی گئی۔