سپریم کورٹ: عدم پیروی پر خارج دیوانی مقدمات کی بحالی کا فیصلہ عجلت میں نہ کیا جائے

اسلام آباد: سپریم کورٹ نے دیوانی مقدمے کی بحالی سے متعلق کیس میں جسٹس محمد علی مظہر کا تحریر کردہ فیصلہ جاری کر دیا ہے، جس میں عدالتوں کو جلد بازی میں فیصلے نہ کرنے کی ہدایت کی گئی ہے۔ ایکسپریس نیوز کے مطابق فیصلے میں کہا گیا کہ انصاف کا ترازو نہ خودکار طور پر مقدمہ خارج کرنے کی طرف جھکتا ہے اور نہ ہی بحالی کی طرف۔

فیصلے کے مطابق دیوانی کیس 2016 سے زیر التوا رہا، تاہم اس تاخیر کی ذمہ داری درخواست گزار یا اس کے وکیل پر ڈالنے کے لیے کوئی سابقہ ریکارڈ موجود نہیں۔ عدالت نے یہ بھی کہا کہ وکیل پیش نہ ہو تو عدالت اپنے صوابدیدی اختیار کے تحت عدم پیروی پر مقدمہ خارج کر سکتی ہے۔

عدالت نے قرار دیا کہ وکیل میں پیشہ ورانہ ذمہ داری کا احساس نہ ہو تو نقصان موکل کو اٹھانا پڑتا ہے۔ موکل کو بھی چوکس رہ کر مقدمے کی باقاعدہ پیروی کرنی چاہیے، تمام ذمہ داری وکیل پر چھوڑ کر لاتعلق نہیں ہونا چاہیے اور وکیل کی غفلت کو نظرانداز نہیں کرنا چاہیے۔

فیصلے میں وکلا سے کہا گیا کہ وہ تاریخِ سماعت، کاز لسٹ اور متعلقہ بنچوں کا درست ریکارڈ رکھیں، مقدمے کے ہر قانونی پہلو کو مدنظر رکھیں اور موکل کو پیش رفت، ممکنہ خطرات اور تصفیے کی کسی پیشکش سے آگاہ رکھیں۔

عدالت نے لکھا کہ ٹھوس وجہ کے بغیر وکیل کی غفلت سے مقدمہ عدم پیروی پر خارج ہونا پیشہ ورانہ ساکھ پر سنگین داغ ہے اور اس پر بار کونسلز میں شکایت بھی دائر ہو سکتی ہے۔ معقول وجہ ہو اور انصاف کے تقاضے ہوں تو خارج شدہ مقدمہ بحال کیا جا سکتا ہے۔ مقدمات کا فیصلہ محض حد سے زیادہ تکنیکی نکات پر بھی نہیں چھوڑا جا سکتا۔

سپریم کورٹ نے لاہور ہائیکورٹ میں دائر سول ریویژن درخواستیں اصل حیثیت میں بحال کر دیں۔ بحالی ہر مقدمے میں 10 ہزار روپے جرمانے سے مشروط ہے، جو لاہور ہائیکورٹ بار ایسوسی ایشن کے میڈیکل سینٹر کے اکاؤنٹ میں جمع کرانا ہوگا اور رسیدیں رجسٹرار لاہور ہائیکورٹ کے سامنے پیش کی جائیں گی۔