اسلام آباد ٹریفک پولیس کا خواتین کے لیے مفت اسکوٹی تربیتی پروگرام میں توسیع کا اعلان

اسلام آباد: اسلام آباد ٹریفک پولیس نے خواتین کی جانب سے بھرپور ردِعمل اور دلچسپی کے پیش نظر مفت اسکوٹی تربیتی پروگرام میں توسیع کا اعلان کر دیا ہے۔ اب خواتین نومبر کے دوسرے پندرہ روزہ مرحلے میں بھی مفت اسکوٹی چلانے کی تربیت حاصل کر سکیں گی۔

چیف ٹریفک آفیسر کائنات اظہر خان کے مطابق خواتین کی بڑی تعداد کی دلچسپی کے باعث تربیتی پروگرام کو دو مراحل میں تقسیم کیا گیا ہے۔ پہلے مرحلے میں یکم سے 15 نومبر تک تربیت حاصل کرنے والی خواتین کے علاوہ وہ خواتین بھی 16 سے 30 نومبر تک تربیت حاصل کر سکیں گی جنہیں پہلے مرحلے میں جگہ نہیں مل سکی تھی۔

کائنات اظہر خان نے کہا کہ اسلام آباد ٹریفک پولیس خواتین کو بااختیار بنانے کے لیے مفت اسکوٹی تربیتی پروگرام جاری رکھنے کا فیصلہ کر چکی ہے۔ خواتین کی سہولت اور انہیں خودمختار بنانے کے لیے ایسے اقدامات مستقبل میں بھی جاری رکھے جائیں گے۔

چیف ٹریفک آفیسر کا کہنا تھا کہ اسلام آباد ٹریفک پولیس کا عزم خواتین کو بااختیار بنانا اور انہیں اسکوٹی چلانے کی تربیت کے ذریعے آمدورفت میں سہولت فراہم کرنا ہے۔