گورنر راج اور ایمرجنسی کے خلاف درخواستیں کاز لسٹ سے خارج، پی ٹی آئی ماہرین سے مشاورت کرے گی

اسلام آباد: پاکستان تحریک انصاف نے خیبرپختونخوا میں گورنر راج اور ایمرجنسی کے نفاذ کے خلاف پشاور ہائیکورٹ کی درخواستوں کو کاز لسٹ سے خارج کیے جانے کے معاملے پر آئینی و قانونی ماہرین سے مشاورت کا فیصلہ کیا ہے۔

پارٹی کی جانب سے وفاقی آئینی عدالت کے فیصلے کے قانونی پہلوؤں کا جائزہ لیا جا رہا ہے اور اس کے خلاف نظرثانی دائر کرنے کے امکان پر بھی غور کیا جا رہا ہے۔

دوسری جانب پشاور ہائیکورٹ نے خیبرپختونخوا میں گورنر راج اور ایمرجنسی کے نفاذ، معزول وزیراعلیٰ سہیل آفریدی سمیت پاکستان تحریک انصاف کے متعدد رہنماؤں کی حراست کے خلاف دائر درخواستیں کاز لسٹ سے خارج کر دی ہیں۔

یہ اقدام وفاقی آئینی عدالت کے 5 نومبر کے حکم کی روشنی میں کیا گیا، جس نے خیبرپختونخوا حکومت کی جانب سے دائر درخواستوں پر فیصلہ سناتے ہوئے پشاور ہائیکورٹ میں 12 اکتوبر یا اس کے بعد آئین کے آرٹیکل 199 کے تحت دائر مقدمات کی کارروائی معطل کر دی تھی۔

وفاقی آئینی عدالت کے حکم کے بعد پشاور ہائیکورٹ نے ہدایت جاری کی کہ 12 اکتوبر 2026ء یا اس کے بعد دائر آئین کے آرٹیکل 199 کے تحت تمام آئینی درخواستیں سماعت کے لیے مقرر نہ کی جائیں۔

اس عدالتی پیش رفت کے نتیجے میں گورنر راج اور ایمرجنسی کے خلاف پی ٹی آئی کی درخواستوں کی سماعت بھی متاثر ہوئی ہے۔ پارٹی ذرائع کے مطابق آئندہ قانونی لائحہ عمل اور ممکنہ نظرثانی درخواست کے حوالے سے فیصلہ کرنے کے لیے آئینی و قانونی ماہرین سے مشاورت جاری ہے۔