وزیراعظم کا غزہ میں اسرائیلی مظالم پر اظہارِ تشویش، انسانی امداد بڑھانے کی ہدایت

اسلام آباد: وزیراعظم شہباز شریف نے غزہ کے فلسطینی عوام کو بنیادی انسانی امداد سے محروم رکھنے کے لیے اسرائیل کی جانب سے مسلسل غیر قانونی اقدامات پر تشویش کا اظہار کیا ہے۔

وزیراعظم ہاؤس سے جاری بیان میں شہباز شریف نے کہا کہ غزہ کے ان بچوں کی تصاویر دل دہلا دینے والی ہیں جن کے پاس پناہ کے لیے کوئی جگہ نہیں۔

انہوں نے کہا کہ غزہ میں خیموں کے زیرِ آب آنے، بے گھر فلسطینی بچوں کے بے یار و مددگار ہونے، شدید سردی اور بھوک کے دل دہلا دینے والے مناظر انتہائی افسوسناک ہیں۔

وزیراعظم نے جنگ بندی کی خلاف ورزیوں، بین الاقوامی قوانین کی پامالی اور فلسطینی عوام کے خلاف اسرائیل کی مسلسل جارحیت کی شدید مذمت کی۔

وزیراعظم نے وزارتِ خارجہ کو ہدایت کی ہے کہ انسانی امداد کی فوری فراہمی میں اضافے کے لیے تمام ممکنہ ذرائع بروئے کار لائے جائیں۔

خیال رہے کہ غزہ میں شدید بارشوں کے باعث 70 ہزار خیمے زیرِ آب آ گئے، جس سے 3 لاکھ 50 ہزار بے گھر افراد متاثر ہوئے۔ حماس نے خیموں کے زیرِ آب آنے کو اسرائیلی محاصرے کا نتیجہ قرار دیا ہے۔