کوئٹہ: آئی جی پولیس بلوچستان کا سمارٹ ویمن پولیس اسٹیشن کا دورہ، خواتین کے تحفظ پر زور

کوئٹہ: آئی جی پولیس بلوچستان محمد طاہر نے کہا ہے کہ خواتین کو ہمارے معاشرے میں نہایت اہم مقام حاصل ہے، ملکی ترقی و خوشحالی میں خواتین کے کردار سے انکار ممکن نہیں۔ خواتین زندگی کے ہر شعبے میں اپنی صلاحیتوں کا مظاہرہ کرتے ہوئے ملک و قوم کی ترقی میں اہم کردار ادا کر رہی ہیں۔
ان خیالات کا اظہار انہوں نے سمارٹ ویمن پولیس اسٹیشن سول لائن کے دورے کے موقع پر مختلف شعبوں کا معائنہ کرتے ہوئے کیا۔ اس موقع پر ڈی آئی جی کوئٹہ عمران شوکت، ایس ایس پی آپریشنز ضیاء اللہ مندوخیل سمیت دیگر افسران بھی موجود تھے۔
خواتین کا تحفظ اولین ترجیح
آئی جی پولیس نے کہا کہ خواتین کے حقوق کا تحفظ، انہیں محفوظ ماحول کی فراہمی اور ان کے مسائل کا بروقت حل پولیس کی اہم ذمہ داریوں میں شامل ہے۔ خواتین پولیس اہلکار معاشرے میں امن و امان کے قیام، خواتین کو انصاف کی فراہمی اور ان کے تحفظ کے لیے اہم خدمات انجام دے رہی ہیں۔
انہوں نے مزید کہا کہ خواتین کو معاشرے میں اپنے امور بلا خوف و خطر سرانجام دینے کے لیے سازگار ماحول فراہم کرنا ہم سب کی انفرادی و اجتماعی ذمہ داری ہے تاکہ خواتین خود کو محفوظ سمجھیں۔ خواتین کا تحفظ اور ان کے مسائل کا فوری حل بلوچستان پولیس کی اولین ترجیحات میں شامل ہے۔
تھانوں میں خواتین عملہ تعینات
خواتین کی عزت و تکریم، عصمت و عفت کی حفاظت، معاشی خود مختاری اور جنسی استحصال سے تحفظ یقینی بنانا اور انہیں معاشرے میں تمام حیثیتوں میں جائز مقام دلوانا ہمارا بنیادی فریضہ ہے۔ صوبہ بھر کے تھانوں میں لیڈی پولیس اہلکاروں پر مشتمل سٹاف تعینات کیا گیا ہے تاکہ خواتین اپنے مسائل کے حل کے لیے خواتین عملے سے بلا جھجک رابطہ کر سکیں اور ان کے مسائل کو ترجیحی بنیادوں پر حل کیا جا سکے۔
انہوں نے اس عزم کا اظہار کیا کہ بلوچستان پولیس خواتین کے تحفظ اور انہیں درپیش مسائل کے حل کے لیے مؤثر اقدامات جاری رکھے گی۔











