گنز میں گرلز مڈل اسکول کی مرمت پاکستان کوسٹ گارڈز کے تعاون سے جاری

گنز (گوادر): صوبائی حکومت بلوچستان کی تعلیمی پالیسی کے تحت سرکاری تعلیمی اداروں میں بنیادی سہولیات کی فراہمی اور تعلیمی ماحول کی بہتری کے اقدامات جاری ہیں۔
اسی سلسلے میں ضلع گوادر کے ساحلی علاقے گنز میں گورنمنٹ گرلز مڈل اسکول کی خستہ حال عمارت کی تزئین و مرمت کا کام محکمہ تعلیم کی کاوشوں اور پاکستان کوسٹ گارڈز کے تعاون سے جاری ہے۔
ڈسٹرکٹ ایجوکیشن آفیسر (خواتین) گوادر زرآتون نے اسکول کا دورہ کیا اور عمارت کی خستہ حالی، فرنیچر کی عدم دستیابی اور طالبات کو درپیش تعلیمی مسائل کا جائزہ لیا۔ جائزہ لیتے ہوئے بہتری کے لیے عملی اقدامات کا آغاز کیا گیا۔
مقامی نمائندوں کے ساتھ مشاورت کے بعد پاکستان کوسٹ گارڈز سے باضابطہ رابطہ کیا گیا، جس کے نتیجے میں اسکول کی مرمت و تزئین کا کام شروع ہوا۔
اسکول کی ماضی اور موجودہ تصاویر عمارت میں آنے والی نمایاں بہتری کی عکاسی کرتی ہیں، جبکہ طالبات کے لیے فرنیچر کی فراہمی بھی زیر غور ہے۔
یہ پیش رفت محکمہ تعلیم، مقامی نمائندوں اور معاون اداروں کے باہمی تعاون کی مثال ہے، جس کا مقصد بچیوں کو بہتر، محفوظ اور سازگار تعلیمی ماحول فراہم کرنا اور علاقے میں تعلیم کے فروغ کو یقینی بنانا ہے۔











