فخر زمان کی سنچری، پاکستان ہوم گراؤنڈ پر پہلی بار سہ ملکی سیریز کا چیمپئن

لاہور: قذافی اسٹیڈیم میں کھیلے گئے سہ ملکی ون ڈے سیریز کے فیصلہ کن مقابلے میں قومی ٹیم نے 326 رنز کا ہدف 9 گیندیں قبل حاصل کرکے ہوم گراؤنڈ پر پہلی بار سہ ملکی سیریز کا ٹائٹل اپنے نام کر لیا۔

سری لنکا نے پہلے بیٹنگ کرتے ہوئے مقررہ 50 اوورز میں 8 وکٹوں کے نقصان پر 325 رنز بنائے۔ پاکستان نے ٹاس جیت کر پہلے فیلڈنگ کا فیصلہ کیا تھا۔

ابتدائی جھٹکے اور شراکت

جواب میں پاکستانی ٹیم کا آغاز مایوس کن رہا۔ معاذ صداقت 5 رنز بنا کر آؤٹ ہوئے، جبکہ بابر اعظم کھاتہ کھولے بغیر پویلین لوٹ گئے۔ دونوں کھلاڑی سری لنکن فاسٹ بولر دلشان مدھوشناکا کا شکار بنے۔

ابتدائی دو وکٹیں صرف 14 رنز پر گرنے کے بعد فخر زمان اور سعد بیگ نے ذمہ دارانہ اور جارحانہ بیٹنگ کرتے ہوئے دباؤ بڑھایا۔ دونوں کے درمیان 149 رنز کی شراکت قائم ہوئی۔

سعد بیگ نے 74 رنز کی اننگز کھیلی اور 27ویں اوور میں مہیش تھیکشانا کی گیند پر کیچ آؤٹ ہوئے۔

فخر زمان کی سنچری

فخر زمان نے 99 گیندوں پر 127 رنز بنائے، جن میں 11 چوکے اور 6 چھکے شامل تھے۔ یہ ان کے ون ڈے انٹرنیشنل کیریئر کی 12ویں سنچری تھی۔ وہ 34ویں اوور میں آؤٹ ہوئے۔

ان کے آؤٹ ہونے کے کچھ دیر بعد سلمان علی آغا بھی پویلین لوٹ گئے، جس سے سری لنکا کو واپسی کا موقع ملا، تاہم پاکستانی بلے بازوں نے ہدف کا تعاقب کامیابی سے مکمل کیا۔

سری لنکا کی جانب سے کامندو مینڈس نے 131 رنز بنائے، جو ان کے ون ڈے کیریئر کی پہلی سنچری تھی۔ ان کی اننگز میں 12 چوکے اور 2 چھکے شامل تھے۔ پون رتھنائیکے نے 77 جبکہ اوشکا فرنانڈو نے 38 رنز اسکور کیے۔

پاکستان کی جانب سے نسیم شاہ اور حارث رؤف نے دو، دو وکٹیں حاصل کیں۔ فائنل کے لیے قومی ٹیم میں شاداب خان کی جگہ فہیم اشرف کو شامل کیا گیا تھا۔ پاکستان کی قیادت شاہین شاہ آفریدی نے کی۔

فخر زمان کو شاندار سنچری پر میچ کا بہترین کھلاڑی جبکہ عرفات منہاس کو سیریز کا بہترین کھلاڑی قرار دیا گیا۔