قازقستان سے گولڈ میڈل جیت کر شیرباز مری کوئٹہ پہنچ گئے، ایئرپورٹ پر شاندار استقبال

کوئٹہ: قازقستان میں منعقدہ نومیڈ ایم ایم اے چیمپئن شپ میں گولڈ میڈل جیت کر پاکستان اور بلوچستان کا نام روشن کرنے والے قومی فائٹر شیرباز مری کوئٹہ پہنچ گئے، جہاں ایئرپورٹ پر ان کا پرتپاک استقبال کیا گیا۔

استقبال کرنے والوں میں معاون برائے محکمہ داخلہ بابر یوسفزئی، ڈائریکٹر جنرل کھیل بلوچستان ڈاکٹر یاسر بازئی، محکمہ کھیل کے افسران، اہل خانہ، دوست احباب اور شہریوں کی بڑی تعداد شامل تھی۔

اس موقع پر بابر یوسفزئی اور ڈاکٹر یاسر بازئی نے شیرباز مری کو عالمی سطح پر کامیابی اور گولڈ میڈل جیتنے پر مبارکباد دی۔ اسسٹنٹ ڈائریکٹر ایکٹیویٹیز محمد آصف لانگو، ڈپٹی ڈائریکٹر ایڈمن جمیل احمد اور محکمہ کھیل کے دیگر افسران بھی استقبال کے موقع پر موجود تھے۔

ایئرپورٹ پر میڈیا سے گفتگو کرتے ہوئے بابر یوسفزئی نے کہا کہ شیرباز مری کی عالمی سطح پر کامیابی بلوچستان اور پاکستان کے لیے باعثِ فخر ہے۔ ان کے بقول وزیراعلیٰ بلوچستان میر سرفراز بگٹی اور حکومتِ بلوچستان کا وژن ہے کہ نوجوانوں کی بھرپور حوصلہ افزائی اور سرپرستی کی جائے۔ بلوچستان کے نوجوانوں میں بے پناہ صلاحیتیں موجود ہیں اور انہیں آگے بڑھنے کے مواقع فراہم کرنا ضروری ہے۔ حکومتِ بلوچستان نوجوان کھلاڑیوں کی حوصلہ افزائی اور سرپرستی جاری رکھے گی۔

شیرباز مری نے کہا کہ نومیڈ ایم ایم اے چیمپئن شپ میں پاکستان کے لیے گولڈ میڈل جیتنا ان کے لیے اعزاز ہے، اور قازقستان میں پاکستان کی نمائندگی اور قومی پرچم بلند کرنا فخر کا باعث ہے۔ انہوں نے کامیابی کے سفر میں تعاون اور حوصلہ افزائی پر حکومتِ بلوچستان اور محکمہ کھیل کا شکریہ ادا کیا اور کہا کہ انہوں نے چیمپئن شپ کے لیے بھرپور محنت کی اور مشکلات کے باوجود ہمت نہیں ہاری۔

انہوں نے بتایا کہ ان کا اگلا ہدف کراٹے کومبیٹ ہے اور امید ہے کہ محکمہ کھیل مستقبل میں بھی ان کی سرپرستی اور معاونت جاری رکھے گا۔

واضح رہے کہ نومیڈ ایم ایم اے چیمپئن شپ میں پاکستان نے مجموعی طور پر دوسری پوزیشن حاصل کرتے ہوئے چار گولڈ اور تین کانسی کے تمغے جیتے۔