ایرانی وزیر خارجہ کی جرمن چانسلر کو انتباہ: ایران پر حملے کی صورت میں یورپ کو بھاری نقصان

تہران: ایرانی وزیرِ خارجہ عباس عراقچی نے یورپ کے توانائی اخراجات پر جرمن چانسلر کے شکوے کے بعد زمین ہلا دینے والے وار کا انتباہ دے دیا۔

ایک بیان میں انہوں نے خبردار کیا کہ کسی بھی نئے حملے کی صورت میں یورپ کو توانائی کے اخراجات سے کہیں زیادہ بھاری قیمت چکانی پڑ سکتی ہے۔

خیال رہے کہ جرمن چانسلر فریڈرک مرز نے کہا تھا کہ ایران کے خلاف جنگ کے باعث یورپ کے توانائی اخراجات میں 100 ارب یورو سے زیادہ کا اضافہ ہوا ہے۔

سماجی رابطوں کی ویب سائٹ ایکس پر بیان دیتے ہوئے ایرانی وزیرِ خارجہ نے یاد دلایا کہ جرمن چانسلر فریڈرک مرز نے گزشتہ سال جون میں ایران پر امریکی اور اسرائیلی حملوں کا خیر مقدم کرتے ہوئے کہا تھا کہ اسرائیل ہم سب کی خاطر یہ گندا کام انجام دے رہا ہے۔

عباس عراقچی نے لکھا کہ 100 ارب یورو اس زمین ہلا دینے والے وار کے سامنے کچھ بھی نہیں ہیں جو ایران کی طاقت ور مسلح افواج ہمارے لوگوں کو نقصان پہنچانے کی جرات کرنے والوں پر کریں گی۔ سرخ لکیریں اب ماضی کا حصہ بن چکی ہیں۔