سکردو میں گھر کے اندر میاں بیوی اور دو کم سن بچے قتل

سکردو: شہر میں جمعہ کے روز ایک گھر کے اندر ایک ہی خاندان کے چار افراد قتل کر دیے گئے، جن میں میاں بیوی اور ان کے دو کم سن بچے شامل ہیں۔

پولیس ذرائع کے حوالے سے ایک نجی ٹی وی چینل کی رپورٹ کے مطابق ابتدائی اطلاعات میں بتایا گیا ہے کہ مقتول بچوں کی عمریں ایک سے پانچ سال کے درمیان تھیں۔

ابتدائی اطلاعات کے مطابق چاروں افراد کو تیز دھار آلات، جن میں چھری اور کلہاڑی شامل ہیں، کے وار سے قتل کیا گیا۔

واقعے کے محرکات اور حالات کے بارے میں تاحال واضح معلومات سامنے نہیں آ سکیں۔ یہ بھی معلوم نہیں ہو سکا کہ قتل کس نے کیا۔

پولیس نے واقعے کا مقدمہ (ایف آئی آر) درج کر لیا ہے اور حقائق کا تعین کرنے کے لیے تحقیقات شروع کر دی گئی ہیں۔