چوہدری سالک حسین کی مریم نواز اور عظمیٰ بخاری کو ہتکِ عزت کے قانونی نوٹس

اسلام آباد: وفاقی وزیر چوہدری سالک حسین نے وزیراعلیٰ پنجاب مریم نواز اور صوبائی وزیر اطلاعات عظمیٰ زاہد بخاری کو ہتکِ عزت کے نوٹس بھیج دیے ہیں۔
ایکسپریس کے مطابق اپنے بیان میں چوہدری سالک حسین نے بتایا کہ انہوں نے اپنے وکیل کے ذریعے دو قانونی نوٹس بھجوائے ہیں، ایک مریم نواز شریف کو اور دوسرا عظمیٰ زاہد بخاری کو۔
انہوں نے کہا کہ انہیں بھیجے گئے قانونی نوٹس کا باضابطہ جواب جمع کروا دیا گیا ہے۔ ان کے بقول قانونی نوٹس کے ذریعے دھمکانے کی کوششیں نہ انہیں خاموش کر سکتی ہیں اور نہ عوامی مفاد اور عوام کی فلاح و بہبود سے متعلق مسائل پر آواز اٹھانے سے روک سکتی ہیں۔
چوہدری سالک حسین کا کہنا تھا کہ صوبہ بدستور شدید بدانتظامی اور بدعنوانی کی دلدل میں پھنسا ہوا ہے۔ ان کے مطابق ان مسائل پر دھمکیوں کے بجائے ذرا سی خود احتسابی اور جوابدہی کی ضرورت ہے۔
انہوں نے مزید کہا کہ پاکستان اور پنجاب کے وسیع تر مفاد میں شفافیت اور احتساب کے لیے ان کا عزم غیر متزلزل ہے۔











