بلال خان کاکڑ کی پاکستان منرلز انویسٹمنٹ فورم 2026 میں بلوچستان کی نمائندگی

کوئٹہ: بلوچستان سرمایہ کاری بورڈ (BBoIT) کے وائس چیئرمین بلال خان کاکڑ نے پاکستان منرلز انویسٹمنٹ فورم 2026 میں بلوچستان کی نمائندگی کرتے ہوئے شرکت کی۔

جہاں انہوں نے وزیراعلیٰ بلوچستان میر سرفراز بگٹی، نائب وزیراعظم و وزیر خارجہ سینیٹر محمد اسحاق ڈار، وزیراعلیٰ پنجاب مریم نواز شریف، مختلف صوبوں کے سیکریٹریز معدنیات اور غیر ملکی مندوبین کے ہمراہ نمائش میں لگائے گئے مختلف اسٹالز کا دورہ کیا۔

اس موقع پر بلال خان کاکڑ نے معزز شخصیات اور غیر ملکی وفود کو بلوچستان میں معدنیات اور کان کنی کے شعبے میں موجود وسیع سرمایہ کاری کے مواقع، صوبے کے قدرتی معدنی وسائل اور اس شعبے کی بے پناہ صلاحیتوں کے حوالے سے تفصیلی بریفنگ دی۔

انہوں نے بلوچستان کے معدنی ذخائر کو ملکی معیشت کے استحکام، صنعتی ترقی اور روزگار کے نئے مواقع پیدا کرنے کے لیے ایک اہم ذریعہ قرار دیا۔

بلال خان کاکڑ نے کہا کہ بلوچستان قدرتی وسائل اور معدنی ذخائر کے حوالے سے غیر معمولی اہمیت کا حامل صوبہ ہے۔ ان وسائل کو جدید ٹیکنالوجی، مؤثر منصوبہ بندی اور سرمایہ کاری کے ذریعے بروئے کار لا کر نہ صرف صوبے بلکہ پورے ملک کی معاشی ترقی میں نمایاں کردار ادا کیا جا سکتا ہے۔

انہوں نے کہا کہ وزیراعلیٰ بلوچستان میر سرفراز بگٹی کے وژن کے مطابق صوبائی حکومت بلوچستان کو ملکی اور بین الاقوامی سرمایہ کاری کا مرکز بنانے کے لیے پرعزم ہے۔

انہوں نے مزید کہا کہ بلوچستان سرمایہ کاری بورڈ معدنیات سمیت مختلف اہم شعبوں میں سرمایہ کاری کے فروغ، بین الاقوامی شراکت داری کے قیام اور سرمایہ کاروں کو سہولتوں کی فراہمی کے لیے فعال کردار ادا کر رہا ہے۔

پاکستان منرلز انویسٹمنٹ فورم 2026 جیسے بین الاقوامی پلیٹ فارمز پاکستان کے معدنی وسائل کو دنیا کے سامنے متعارف کرانے اور عالمی سرمایہ کاروں کی توجہ حاصل کرنے کا بہترین ذریعہ ہیں۔

تصویر: بشکریہ ڈی جی پی آر بلوچستان