سہیل آفریدی، بابر سلیم سواتی اور جنید اکبر کی بازیابی کیلئے وفاقی آئینی عدالت میں درخواست

اسلام آباد: وفاقی آئینی عدالت میں سہیل آفریدی، بابر سلیم سواتی اور رکن قومی اسمبلی جنید اکبر خان کی بازیابی کے لیے آئینی درخواست دائر کر دی گئی ہے۔

درخواست رکن قومی اسمبلی شاندانہ گلزار کی جانب سے آئین کے آرٹیکل 175E کی ذیلی شق 3 کے تحت دائر کی گئی ہے۔ اس میں وزارت داخلہ، چیف سیکرٹری خیبرپختونخوا اور انسپکٹر جنرل پولیس خیبرپختونخوا کو فریق بنایا گیا ہے۔

درخواست میں آئین کے آرٹیکل 232، 234 اور 245 کے تحت حاصل اختیارات کی آئینی حدود سے متعلق اہم سوالات اٹھائے گئے ہیں۔ درخواست گزار کے مطابق ان آئینی دفعات کے تحت کسی بھی شخص کو غیر قانونی طور پر حراست میں رکھنے کا اختیار حاصل نہیں ہے۔

درخواست میں عدالت سے استدعا کی گئی ہے کہ تینوں رہنماؤں کو عدالت میں پیش کرنے کا حکم دیا جائے اور متعلقہ حکام کو ان کے موجودہ مقام اور حراست میں رکھنے کی وجوہات فوری طور پر ظاہر کرنے کی ہدایت کی جائے۔

مزید استدعا کی گئی ہے کہ تینوں رہنماؤں کو وکلا اور اہل خانہ تک رسائی، طبی سہولیات اور تشدد سے تحفظ فراہم کیا جائے۔

درخواست گزار کا مؤقف ہے کہ سیاسی مقاصد کے تحت کی جانے والی کارروائی اختیارات کا ناجائز استعمال اور بنیادی حقوق کی خلاف ورزی ہے۔ لہٰذا عدالت اس معاملے کا نوٹس لے اور متعلقہ حکام کو قانون کے مطابق اقدامات کا پابند بنائے۔