تربت: جامعہ تربت میں بلوچستان میں پانی کی کمی اور میرانی ڈیم پر سیمینار

تربت: عالمی یوم سائنس کی مناسبت سے جامعہ تربت کی فیکلٹی آف سائنس، انجینئرنگ اینڈ آئی ٹی نے سائنس کلب تربت کے اشتراک سے سیمینار منعقد کیا۔

سیمینار کا عنوان تھا: بلوچستان میں پانی کی کمی اور میرانی ڈیم کے آبی، ماحولیاتی اور سماجی و معاشی اثرات۔

ماہرین کا تبادلہ خیال

سیمینار میں ماہرین تعلیم، آبی وسائل اور ماحولیاتی ماہرین نے بلوچستان کو درپیش پانی کے بڑھتے ہوئے مسائل پر تبادلہ خیال کیا۔ اس موقع پر میرانی ڈیم کے آبی، ماحولیاتی، زرعی اور سماجی و معاشی اثرات پر خصوصی توجہ دی گئی۔

مقررین نے صوبے میں پانی کی بڑھتی ہوئی قلت سے نمٹنے کے لیے فوری سائنسی تحقیق کی ضرورت پر زور دیا۔

سیمینار کی نظامت فیکلٹی کے ڈین ڈاکٹر حنیف الرحمٰن نے کی۔ انہوں نے کہا کہ خطے کے ماحولیاتی اور زرعی مسائل کو سمجھنے اور ان کے پائیدار حل تلاش کرنے کے لیے بین الشعبہ جاتی مکالمہ اور علمی مباحثہ ناگزیر ہے۔

سیمینار سے ماہر ماحولیات و آبی امور پزیر بلوچ، انجینئر رضا صمد، کاریز سسٹم کے ماہر ڈاکٹر شبیر احمد اور فیکلٹی ممبر ڈاکٹر عبدالقیوم نے بھی خطاب کیا۔

تربت اور گوادر کی آبی صورتحال

مقررین نے تربت اور گوادر کی آبی صورتحال کا جائزہ لیتے ہوئے ماحولیاتی تبدیلی، زیر زمین پانی کے حد سے زیادہ استعمال اور آبی وسائل کی محدود دستیابی کی وجہ سے پیدا ہونے والے چیلنجز کو اجاگر کیا۔

انہوں نے پانی کے منصفانہ اور شفاف نظم و نسق کا فریم ورک نافذ کرنے کی ضرورت پر زور دیا۔

جامعہ تربت کے ترجمان کے مطابق وائس چانسلر پروفیسر ڈاکٹر گل حسن نے اپنے پیغام میں فیکلٹی آف سائنس، انجینئرنگ اینڈ آئی ٹی کی جانب سے علاقائی انفراسٹرکچر اور ماحولیاتی مسائل پر کی جانے والی تحقیقی سرگرمیوں کو سراہا۔

انہوں نے جدید تعلیم اور مصنوعی ذہانت کے فروغ اور پائیدار ترقی کے لیے جامعہ تربت کے عزم کا بھی اعادہ کیا۔

تصویر: بشکریہ ڈی جی پی آر بلوچستان