بانی پی ٹی آئی کا قیادت کو مولانا فضل الرحمان کے ساتھ وسیع اتحاد کا حکم

اسلام آباد: بانی پی ٹی آئی عمران خان نے پی ٹی آئی کی قیادت کو مولانا فضل الرحمان کے ساتھ وسیع اتحاد کرنے کا حکم دے دیا ہے۔

نجی ٹی وی کے مطابق بانی پی ٹی آئی نے پارلیمنٹ کی پارلیمانی کمیٹیوں میں پی ٹی آئی کے ارکان کی واپسی کی تجویز مسترد کر دی ہے۔

اڈیالہ جیل میں بدھ کے روز بیرسٹر سلمان صفدر اور لطیف کھوسہ کے ساتھ ملاقات میں لطیف کھوسہ نے پی ٹی آئی ارکان کی پارلیمانی کمیٹیوں میں واپسی کا مشورہ دیا تھا۔

بانی نے کہا کہ موجودہ حکومت کے متعلق پارلیمنٹ میں سخت موقف اور بائیکاٹ برقرار رہنا چاہیے، کیونکہ حکومت سے روابط رکھنا یا تعاون کرنا اس حکومت کو جواز فراہم کرتا ہے۔

اپوزیشن لیڈرز پر اعتماد

بانی پی ٹی آئی نے قومی اسمبلی اور سینیٹ میں اپوزیشن لیڈرز ناصر عباس اور محمود اچکزئی پر اعتماد کا اعادہ کیا۔ انہوں نے ہدایت کی کہ پی ٹی آئی کی سیاست کے فیصلوں کا اختیار محمود اچکزئی اور راجہ ناصر عباس کے پاس ہی رہے گا۔

بانی نے کہا کہ اپوزیشن اتحاد بنانے کے فیصلے پی ٹی آئی قیادت نہیں بلکہ اپوزیشن لیڈرز کریں۔ ان کی ہدایت ہے کہ مولانا فضل الرحمان سے اپوزیشن رہنما بات کریں اور اپوزیشن اتحاد کے ساتھ آگے بڑھا جائے۔

پی ٹی آئی کے ذرائع کے مطابق ملاقات کرنے والے دو وکلا نے سلمان اکرم راجہ کے متعلق بانی پی ٹی آئی سے شکایت کی۔

بانی پی ٹی آئی اپنی اہلیہ کی رہائی اور علاج کے لیے رضامند ہیں۔ انہوں نے صوبوں کے حوالے سے اپنا موقف دہرایا اور 28ویں ترمیم پر 26ویں اور 27ویں ترمیم والا موقف برقرار رکھنے کی ہدایت بھی کی۔

لطیف کھوسہ محمود اچکزئی اور راجہ ناصر عباس کے ساتھ ملاقات کریں گے۔